IANG DOMBA#2 Ngahaeub ka ujungberung kira-kira wanci jam opatan, beuteung ardasim ngusial nantang dieusian,mun dieusian sorabi bondon tada teuing ni'matna, kitu ceuk pikirna, ngan lapur tong boro sorabi bondon, dalah bondona ge euweuh sahulu hulu acan ngulampreng. Beuteung domba ge sigana sarua jeung manusa, sungutna mimiti singberele, marenta jajan. "Jalu...Bajir...sabar nya sugan dihareup aya tukang nasi wuduk!" ceuk ardasim ngupahan. Sakejapan domba repeh,apaleun meureun wanci sakitu tirisna nyarap nasi wuduk tada teuing ni'matna. Domba jeung ardasim narikreuh deui, mapay mapay trotoar.
Anjog ka pertiluan cibiru, abringan domba jadi dua kubu, nu lima hayang liwat by pass da meh bisa sakalian nyatuan disisi jalan, nu lima deui mengkol ngatuhu mapay jalan arah ka cicaheumkeun. Ardasim salaku pimpinan, buru buru nyekel kendali, tambang domba nu harayang lewat bypass diperod cena mengkol ka katuhu, daek teu daek kapaksa domba nu lima teh nurut, paureun meureun mun ngalawan ka dunungan ancamana dipecat atawa dikere teu dibere hakaneun. Satengah jam tiharita jog anjog ka terminal cicaheum, sora calo raeng, jalma jalma mimiti pabuis, angkot angkot pasurikapan minuhan jalan. "Royom....royom....royom!" ceuk calo. Ardasim curinghak,hatena aya niat hayang naek angkot sangkan tereh cenah, tapi kumaha sijalu jeung sibajir piraku cena pagiling gisik jeung penumpang sejen. Niatna ngarempot deui,naek angkotna bedo, antukna nunutur buntut angkot jurusan cicaheum-ciroyom itung itung pituduh jalan meh teu nyasar cenah,balukarna angkot maju ngilu maju, angkot ngetem ardasim oge ngilu ngetem. Nepi kapengkolan gasibu, didinya loba nu balawiri, marake kaos pleus calana trening, keur sarepor siganamah. Ardasim jongjon nungtun dombana, keur kitu aya nu ngincid miheulaan ardasim, panona kapaksa ngareret. Hatena ngaranjug, aya vega ngatini keur joging cenah. Teuing timana mimitina bet ujug-ujug nyangka vega ngatini padahal nu katempo ngan ukur bujurna wungkul, bujur vega ngatini ngiles,katutupan bujur domba nu leumpangna miheulaan. Saparapat jam tiharita, ardasim rungah ringeuh, salah jalan sigana mah angkot nu dituturkeunana ge teu tembong deui dihareup, nu matak reuwas deui naha bet aya dijalan layang pasopati. Keur kitu hawar hawar kadenge sora sirineu, beuki lila beuki atra, pacampur jeung sora kenalpot motor gurang gerung patembalan.Aya geng motor keur diuber uber pulisi. Ngadenge sora sirineu beretek domba lalumpat miheulaan ardasim, ardasim kasered geblug labuh,ku domba teu dipalire, awakna ngabadug trotoar, ngait kana tihang listrik, ngagolentel deui, kasered deui, eureun eureun di hareupeun rumah sakit hasan sadikin, persis dilawang UGD. Nu aya didinya gujrud, cenah aya pasen dianteur ku domba, teu ilaharna. Beja pabeja-beja, saeusi rumah sakit panasaran harayang nempo, nu diimpus ngabelaan diringkid jeung impusanana, nu keur dicabut huntu kokoceakan diculkeun kitu bae,dikamar mayat ge harudang harayang nempo.Beu! The end.*syam ridwan* [ nu peryogi buku humor sunda keom sakedap#1 sareng#2 tiasa dipilari di Books city Buaran mall, Giant Ciledug, Metroplitan tangerang, Grand mall bekasi,Lippo Cikarang, Mall Karawang, Mall Cianjur, SCT Sadang, Griya Sumedang, sareng gramedia bdg]