Baraya, Tina Riungan Gd Sate ngeunaan Bencana: (1) Panganteur
Baraya, Poe Juma'ah, 12 Maret 2010 minggu kamari aya acara anu cukup penting di kota Bandung kalayan anu jadi candolina (nu boga hajatna) nyaeta Pamarentah Provinsi Jabar. Ieu acara diaranan "saresehan kepedulian bersama terhadap mitigasi bencana" dilaksanakeun di rohangan Pangrango, Gedung Sate, komplek gubernuran Jabar, Bandung, ti jam 8 nepi ka jam 12 wib (ari anggeus acara, ari ngong adza Juma'ahan). Acara anu kasebut di luhur minangka “round table” munggaran dina raraga usaha pikeun ngurangan korban alatan bencana alam. Ieu acara dibageakeun laju dibuka kalawan resmi ku Gubernu Jabar, Bp. H. Ahmad Heryawan. Acara ditutup ku H. Sobirin, salah saurang aktivis lingkungan hidup Jabar di Bandung. Dina eta acara hadir tur biantara opat narasumber kalawan dikawitan ku Kang Iwan S (Ketua BPLHD Jabar) anu ngadugikeun roadmap saresehan. Narasumber anu 4 teh nyaeta: 1. Bp Sukhyar ti Badan Geologi, ngadugikeun potensi bencana alam di Jabar; 2. Kang Ridwan Kamil, ngadugikeun perkara "community development" dina raraga mitigasi (ngurangan risiko) bencana; 3. Kang HR Hidayat Suryalaga (abah Surya), ngadugikeun materi mitigasi bencana numutkeun budaya; sareng 4. Kang Iwan Abdulrachman (abah Iwan) ngadugikeun pasoalan mitigasi bencana numutkeun pangwangunan sosial. Anapon moderator acara nyaeta bp Imam A Sadisun ti itb sareng bp Sobirin. Ieu acara diluuhan ku kl 150 uleman ti rengrengan wakil-wakil Pamarentah Daerah, instansi-intansi Pamarentah anu pakait, LSM, peguruan tinggi, pemerhati, para wartawan jeung uleman sanesna. Anu hadir sakitu jumlahna tetep lengkep nepi ka acara rengse tabuh 12 siang. Dina sela-sela acara, Kang Iwan Abdulrachman ngahaleuangkeun kawih-kawih ciptaan anjeunna nalika anjeunna sareng kanca-kancana nuju ngaevakuasi korban bencana dina sababaraha kajadian bencana. Acara ditutup ku ikrar babarengan anu dibacakeun ku abah Iwan. Eusi ikrar nya eta patekadan jeung lengkah tindakan pikeun rereongan merhatikeun masalah-masalah bencana alam, ngurangan risiko bencana alam, miara alam, mere bantuan tur mulihkeun ka anu jadi korban bencana alam ku usaha-usaha sinergi anu didasarkeun kana kaarifan lokal, sosial budaya jeung lianna, Sugan aya waktu, ka hareup mudah-mudahan bisa katepikeun kacindekan-kacindekan penting ti masing-masing narasumber anu kasebut bieu. Tapi, anu pang pentingna tina acara di luhur teh teu aya lian ti lajuninglaku (follow up) sangkan masyarakat anu dumuk di lokasi-lokasi potensi bencana bisa praktek langsung mitigasi (usaha-usaha pikeun nyinglarkeun bencana atawa ngurangan risiko bencana kana tingkat anu minimal teu aya korban jiwa). manar
