Kulantaran kamari rame perkara turunan Kangjeng Nabi, kabeneran kuring boga buku anyar terjemahan, judulna teh "Orang Arab di Nusantara", karangan Dr. LWC Van der Berg. Aslina ieu buku medal di taun 1886 dimedalkeun ku Harvard University, jadi umurna geus leuwih ti 100 taun. Nu ngarangna LWC Van Der Berg, salah saurang penasehat Gubernur Jenderal Hindia Walanda samemeh Dr. Snouck Hurgronye.
Tah dina buku ieu dicaritakeun yen urang Arab di Hindia Walanda sabagian gede asalna ti Hadralmaut. Penduduk di Hadralmaut aya opat klasifikasi: 1. Golongan SAYID 2. Suku-Suku 3. Golongan menengah 4. Golongan Budak Nu disebut golongan SAYID nyaeta khusus katurunan Al Husein, putu Kangjeng Nabi. Lamun lalaki marake gelar HABIB (jamak: Habaib), lamum awewe gelarna HABABAH. Cenah ceuk buku eta, nyebutkeun "HABIB AKHMAD", bener, tapi lamun nyebutkeun "AHMAD SAURANG HABIB", salah, sabab kuduna AHMAD saurang SAYID". Katurunan Al Hasan, putu Kangjeng Nabi nu saurang deui, disebut golongan SYARIF (jamak: ASYRAF). Tapi golongan Syarif jarang di Hadralmaut. Jadi para Habib di urang, muereun ngakuna saurang Sayid, nyaeta golongan katuruan Al Husein. Di Hadralmaut, kaum Sayid kacida dipikahormat ku masyarakatna, tapi di koloni ARab di Indonesia, teu pati dipikahormat ku Arab golongan biasa (lain Sayid), sanajan kabiasaan nyium leungeunna masih dipraktekkeun. Di Pekalongan, Semarang, Pontianak oge ditempat sejen, para Sayid nu lahir didieu, jeung khususna nu geus leungit ciri Arabna, sok ngaganti gelar sayidna jadi Syarif, saolah-olah maranehna turunan Al Hasan. Kitu cenah, ah ieu mah sakadar hayang babagi we, pedah bukuna rada aneh, perkara urang Arab di Indonesia jeung dijieun leuwih ti 100 taun katukang. Buku ieu, keur urang Sunda aya nu matak hemeng. Nu kahiji eusi panganteur (kata pengantarna) ti Dr. Karel A, Seetbrink jeung Ismail Fajrie Alatas, nu nyebutkeun Hoelle, salah saurang penasehat Gubernur Jendral, Walanda nu gede pangaruhna kana basa Sunda, sobatna panghulu M. Musa, panghulu Garut) teh sabenerna phobia/ paranoid Islam. Hoelle mimiti nganjurkeun basa Sunda teh make huruf jawa-sunda (hanacaraka) terus huruf laten, padahal ti kalangan pribumi usulna make huruf Arab. Nu kadua, Van den Berg nyebutkeun Bupati Cianjur teh katuruanan Arab!, sanajan geus leungit kaarabana. Duka Bupati Cianjur nu jaman mana, ngan sigana nu sajaman jeung Van den Berg, pertengahan/ akhir abad ka 19. Manawi aya nu terang? Baktos, WALUYA (Mudah-mudahan teu salah maca, rada hese ngartina, duka nu ngaindonesiakeunaa kurang pas, atawa kuringna nu hese ngarti ...hehehe)