> From: "Rahman" <[EMAIL PROTECTED]> > Subject: [Baraya_Sunda] dihakan eh... ngahakan maung euy?
Perkara maung, kuring jadi inget, baheula waktu kuring boga pagawean (ngebor) di Karang Agung Tengah Sumatera Selatan. Ieu tempat hara-haraeun pisan. Ti Palembang kudu tumpak speed boat ka hilir walungan Musi, geus deukeut selat Bangka, belok kana kanal nu ngahubungkeun walungan Musi jeung Walungan gede deui dikalereunana, Air Hitam (Di saluran ieu kapal Silk Air murag). Ti Air Hitam asup deui ka anak walunganana, Sungai Lalang. Tah Karang Agung Tengah teh aya di sisi Sungai Lalang. Ti Palembang perlu waktu 5-6 jam tumpak speed boat, lamun tumpak "klotok" mah bisa sapoe-sapeuting! Caritana, kuring bareng jeung pagawe Irigasi PU Palembang tepi ka darmaga Karang Agung Tengah, geus rada sore. Tempat digawe aya sakilo satengahna ti darmaga. Rada bingung oge waktu turun tina speed boat teh, da sabudeureunana ukur leuweung, ngan kabeneran barudak nu ngebor araya di dermaga, keur ngaruseup. Jadi teu keueung leumpang nuju tempat digawe teh. Si Di, tukang ngebor nyaritakeun, cenah dua poe kamari mah, babaturanana si Giman, sosorangan nguseup di Dermaga tepi ka poho balik. Geus poek kakara balik bari ngajingjing lauk. Keur leumpang we ......ari gaur teh sora maung (sigana). Si Giman panik, ber lumpat satekeber kebek ka base-camp,. Waktu tepi, guprak weh maneh ngagoler, walahwah-weuleuhweuh, satengah kapaehan ..... Ngadenge dongeng si Di teh, kuring jadi keueung, untung geus deukeut ka base-camp. Di Base Camp kasampak si Giman, ceuk si Di teh:" Tah Pa, si Giman nu ngajehjer dua poe kamari teh, soak ku sora maung!" Ceuk kuring teh, rada sompral, maksud teh heureuy: " Ah Giman, make sieun sagala ku sora maung, lamun maung ngagaur eta lain rek ngerekeb, tapi neangan bikang!" Na ari beketet teh si Giman teh baeud. Rada reuwas oge, manehna baeud, meureun ceuk jero hatena: "ah .....bapa mah teu ngarasakeun kumaha soakna ngadenge sora maung!" Meuting sapeuting di base-camp teh, isuk sorena kuring balik, da pagawean geus anggeus. Si Giman ngilu rek ka Palembang da aya beulieun. Kuring saparakanca kudu nungguan speedboat jam 10 peuting nu ngaliwat sabab darmaga Karang Agung Tengah lain tujuan speed boat pangakhirna. Tepi ka darmaga teh sore keneh. Kesel oge nungguan, komo geus poek mah, ampir teu kaciri naon-naon jeung eta reungitna mani loba pisan. Si Giman karunyaeun, nitah kuring nungguan di saung we, 100 meter ti dermaga, manehna jeung pagawe PU nu rek nyegat speedboat. Nya kuring nungguan di Saung. Si Giman dudurukan dihareupeun saung, ngarah rada caang, da senter mah dibawa ku manehna, keur mere tanda ka supir speed boat aya panumpang di Darmaga. Teu karasa lelenggutan ,terus gegelehean, sirah diganjel ransel ....ker weh sare. Satengah ngalindur waktu kuring ngadenge aya sora speed boat, gancang ngorejat, gigisik bari luak-lieuk, kaditu-kadieu poek mongkleng teu kaciri naon-naon da dudurukan geus pareum. Korosak-korosak aya sora dihareupeun saung, ditelek-telek teu kaciri nanaon da poek. Gurusuk-gurusuk sora nu kaditu-kadieu, kuring beuki cungas-cingeus, tapi angger teu katempo nanaon. Teu karasa muringkak bulu punduk. Gancangan gegebrig supaya eta nu gugurusukan dinu poek teh nyingkah. Na atuh ari gurusuk teh di kolong saung bari aya sora sesegrok. Kacida reuwasna, tuur jadi leuleus, gancangan gogorwokan ka Si Giman: "Giman ....Giman ...tulung ....senter ...kesinikan" Si Giman teu nembalan, sigana saru jeung sora speed boat nu beuki ngadeukeutan darmaga. Kuring beuki sieun, gek weh cingogo bari kadak-kodok kana saku, kacekel paneker, cekes ...cekes dihurungkeun, bray rada caang ....tapi keukeuh kaluar mah teu katempo nanaon, Paneker diacung-acung, maksud teh hayang katempo kaluar saung, leungeun jadi kapanasan da paneker hurung wae. Nu gugurusukan teu kadenge deui. Teu lila aya senter baranyayan, kurunyung si Giman bari nanya: "Pa ...pa ....speed boat geus datang, eta kunaon cingogo kitu, bari paneker diacung-acung?" "Soak urang mah euy, aya nu gurusukan tah diluar jeung dikolong" "Ah borangan bapa mah, kakara ge ku sora bagong neangan cacing geus soak, komo ku sora maung", ngomongna teh siga nu meupeus keuyang pedah kuring kamari nyebut lamun maung ngagaur lain rek ngerekeb, tapi neangan bikang ........ Baktos, WALUYA