Urang caritakeun bae, Ki Santang teh laju amitan, angkeuhna deuk ngajugjug ka nu jauh, deuk neangan jelema bule. Nya anjog ka sisi gara! Kadeuleu ku inyana, laut motah ngadak-ngadak, lemah eundeur ruag-rieg. Tingeleger hawar-hawar ......! Ceuk Ki Santang: "E-eh! Nahaeun ieuh gara-garana? Nyeung ku nahaeun ngadak-ngadak hayang mulang?"
Kadeuleu di awang-awang, aya mega maju ngidul. Belesat! Ki Santang ngapung ka mega karep inyana tumpak mega Tapi dina mega, aya mipit mudu amit, amun ngala mudu menta, amun numpang mudu nyarita! Ceuk Ki Santang bari ambek: "Ulah sia loba bacot! dibebekeun ieu mega ku dewek! Ngeser! Dewek moal numpang cara lentah Tapi ngilu bari maray! Tah duitna opat kanjut! Kop jeung kanjut-kanjutna! Geuwat dewek anteurkeun ka Pajajaran! Ceuk tukang mega sabari ised: "Ari maray mah sejen deui urusanana! Saenyana ceuk aturan hanteu meunang mawa tumpangan sabab ieu teh mega dines! Tapi ku duit mah kula hanteu buyut! jiga-jigana di lembur dia mah dia teh jawara kedotan!" Ceuk Ki Santang: "Kumaha dia nyahona?" Ceuk tukang mega: "Tina porongos! Sarua jeung porongos tukang eta!" Ceuk Ki Santang: "Tukang naeun?" Ceuk tukang mega: "Tukang mariksa mega ngaliwat!" Ceuk Ki Santang: "Kituh?" Ceuk tukang mega: "Heueuh! Tukang mega mah loba nu sarawan! Sabab tukang mariksa mega morongos sok datang ka tembong gugusi mun can dibere pikeun meuli sisig! Tapi ari dia mah ngilu numpang teh make maray! Tanda jawara kedotan! Hanteu cara tukang mariksa mega Arinyana mah Ngilu ongkoh menta duit ongkoh! Sakalieun teu menta duit ari turun tara nuhun-nuhun acan! Dasar kunyuk didangdanana, ari keur kawasa kacida aingna abong-abong keur kawasa!" Ceuk Ki Santang: "Heueuh! Tapi edas,bapa, loba jasa barajan teh!" "Seug sing jonjon diukna! ulah tukang teuing, megana geus butut! Jeung jamakna amun gujlag amun gijleg puguh langit ayeuna mah legak-legok! Jeung jamakna munteu bisa nyanghunjar sabab ieu teh mega dines Paranti neang Ma Beurang Ari di Kahiyangan Aya bidadari deuk ngajuru! Jeung nyekelanana. ulah pageuh teuing, beusi ucutan tihang megana jeung ulah sabari edeg beusi tiporos Megana geus butut!" Tunda heula, ulah ribut, beusi tiporos; [Lajengkeuneun]
