Bo día a todos. Antes de nada quixera agradecervos, como traballadora de Mancomún e creo que en nome de todos os meus compañeiros, o voso apoio e ánimos recibidos nos últimos meses.
Mais ante a alarmista noticia que saíu publicada onte en A nosa terra, na que fala de despedimentos dos traballadores de Mancomún e do seu peche, quixera aclarar un par de cuestións, como coordinadora do proxecto no CESGA. O CESGA, como todos sabedes, ten un convenio de colaboración firmado coa anterior Consellería de Innovación para o apoio ás actividades de promoción de software libre en Galicia, a través de Mancomún. Este convenio está en vigor ata o 31 de Decembro deste ano, e as indicacións recibidas da Secretaria Xeral de Modernización e Innovación Tecnolóxica, Mar Pereira, son que continuemos coa nosa actividade habitual. Por outra parte, na reunión mantida o pasado mes de Xullo entre Mar Pereira co CESGA, as universidades e AGASOL, indicou que van continuar co seu apoio a Mancomún e ao software libre en Galicia para o que están a traballar nun novo plan de actuación que dea continuidade máis alá deste ano, do que agardamos ter noticias en breve. Respecto aos despedimentos mencionados na nova, o único que dende aquí podemos dicir é que onte mesmo recibimos información por parte da Xerencia da Fundación da Calidade de que Suso Baleato causaba baixa como coordinador de Mancomún. Gustaríame poder darvos máis información que esta, pero é toda a que eu teño. Un saúdo -- Mar Castro Pereiro Centro de Referencia e Servizos de Software Libre www.mancomun.org Avda. de Vigo, s/n 15706 Santiago de Compostela Tel/ Fax: (0034) 981 56 98 10/ 981 59 46 16 <mar.castro @ mancomun.org>