Ari mireng angklung teh, sok inget jaman waktu sakola SMP baheula (awal 1970
an). Harita di SMPN Kadipaten-Majalengka aya sa set angklung pikeun barudak
diajar kasenian. Biasana mah maen angklung teh kaasup kana palajaran ekstra
Kurikuler. Ari latihanana teh sore-sore nepi ka wanci magrib. Guru kasenianana
teh Pak Dodo Darsodo ngarangkep jadi Guru Basa Inggris. Guru basa Inggrisna pa
Dodo, waktu tolab di Bandung nyaeta Pa Suhud Warnaen.
Pak Dodo teh jago maen biola. Jadi upama barudak maen angklung, pak Dodo mirig
laguna ku biola. Harita kuring diajar lagu-lagu standar kayaning "burung
kakatua" nepi ka lagu-lagu kroncong. Sok diajarkeun oge lagu-lagu klasik barat
kayaning Lapaloma, Ramona jrrd. Jadi kuring mah samemeh bisa maen hitar (gitar)
teh maen angklung heula. Diajar wawanohan nada-nada do re mi fa so la si do teh
nya tina angklung. Salian angklung teh aya oge awi ged anu fungsina pikeun
ngagantian alat musik bas. Aya oge drum, pikeun ngaramekeun nada-nada tina
angklung. jadi angklung teh lengkap jiga hiji grup band, aya bas, drum jeung
angklung.
Kamari tanggal 7 November, kuring saparakanca babaturan saangkatan di FISIP UI
ngayakeun reuni, ngayakeun bakti sosial di Sakola SD Gunung Mas Puncak Bogor.
Nyumbang sa set angklung lengkap (3 oktaf), anu bisa dimaenkeun ku 30 siswa SD,
husus mesen ti Saung Mang Udjo. Hargana Rp 3.750.000. Padahal harita teh can
kaluar angklung jadi hiji warisan budaya takbenda ti UNESCO. Sacara pribadi
ngarasa reueus bisa nyumbang angklung pikeun barudak SD, sakalian nineung jaman
baheula waktu SMP.
