[Rantau-Net] INDUAK PASAMBAHAN

[Damrus Lukman]

Title: INDUAK PASAMBAHAN

INDUAK PASAMBAHAN   Manolah Angku rang dapua LapauNet, sambah ambo tibo ka bakeh Angku. Sambah sujui salam diangkek, salam dianjuang kiri jo kanan, lahia kapado Angku surang, batin kapado nan rapek di LapauNet nangko. Sambah kapado niniak-mamak, nan gadang basa batuah, nan bakato bana mahukum adia, ka pai tampek batanyo pulang tampek babarito. Dipabanyak ampun jo maaf, maaf dimintak ka rang banyak, ampun kapado nan Kuaso, titah disarahkan kapado Nabi, sambah taunjuak ka bakeh Angku.   Tatkalo sumua ka digali, tatkalo rantiang ka dipatah, iyo katiko nagari ka diunyi, di balai balairuang panjang, di Pariangan namo dulunyo. Di sinan lah Datuak Parpatiah Nan Sabatang duo jo Datuak Katumanggungan, manurunkan adat jo pusako, dietoang koto jo nagari, sarato luak jo rantaunyo, luak tigo lareh nan duo.   Manonyo lareh nan duo : Partamo, lareh Bodi Caniago, adat Datuak Parpatiah nan Sabatang, asa nan dari Indojati. Kaduo, lareh Koto Piliang, adat Datuak Katumanggungan, barasa dari Rajo.   Manonyo Luak nan Tigo : Partamo, Luak Tanahdata, nan babatu bungo satangkai, nan basungai bakayu tarok, , nan bakampuang di baliak labuah, nan banamo dusun tuo, ba limokaum di sanan, sambilan koto di dalam, duobaleh koto di lua, batabek basawah tangah, sawah gadang satampang baniah. Kaduo, Luak Agam, nan salilik gunuang Marapi saedaran gunuang Singgalang, alaeh saedaran gunuang Pasaman, hinggo lado sulah mudiak, sahinggo dusun Tungga Hilia. Katigo Luak Limo Puluah Koto, dari sisauak Sungai Rimbang, sampai ka sipisau-pisau anyuik, sialang balantak basi, sikokoh pinang tuo. Itulah barik nan bajawab, itunyo tutua nan didanga, kini tasabuik-sabuik juo.   Ujuang labuah Tanjuang Sungayang, di dalam luak jo lareh, babasa ampek balai, badaulat nan dipatuan, ka baruang lunang gunuang pasisie, hinggo pintu rajo ilie, ilie badatuak mudiak batuan. Tuan kadi di Padang Gantiang, Indomo di Saruaso, Mangkudun di Sumaniak, Tuan Gadang di Batipuah, Rajo asa di Pagaruyuang. Itunyo urang nan mamrentah dalam luah nan tigo, sarato lareh nan duo.   Manolah Angku rang dapua LapauNet nangko ! Dek gunuang tatapan kabuik, di sungai jalo bamain, ka padang marantang tali, karimbo bakarek kayu, tabiang ditungkek dengan janji, rimbo dialah jo mufakat, tagak dek duduak di nan rapeklimbago basidang dalam adat, supayo rantak nak saragam, lenggang nak nyo sarayun, suto jo turak nak salasai, nak samo naiek ka antakan, diulua kato sapatah, kato dilipek dalam barih, bana disimpan di limbago, basaba Angku sakatiko.   Kok lai ado sumua di ladang Buliah kito manumpang mandi Kok Umua lai samo panjang Isuak lusa disambuang lai   Sambah Sujuik Ambo, DAMRUS LUKMAN PAKIEH SUTAN BEKASI