Mak Inyiak Sunguik, Uniang Evi, Mak Pakieh Sutan dan Mak Elthaf sarato alek
kasado alahe
tarimo kasih banyak panjalehan kato "sambah" yang tarnyato duo aratinyo, dan
Tambo asa usua urang Minang
Manganai asal usul Urang Awak ko untuak samantaro bialah kito bapijak dulu
ka Tambo yang katonyo dari barasa dari Alexander the Great (wau ! barek
rasonyo mancaritokan kaurang lain)yang kamudian sampai ka Datuk
Katamanggungan dan Parpatiah Nan Sabatang sarato kisah Bundo Kanduang jo
Cindua Mato yang terkenal tu, yang dari sisi ilmu sejarah sangek lamah dalam
hal bukti tatulih jo tahun kajadiannyo. Mungkin juo indak takana (maaf) dek
urang saisuak tu untuak manulihan urutan kisah-kisah sajarah Minang ko ka
batu yang bisa dibaco dek anak-anak cucu baliau2 ko, sarupo nan di Tanah
Jawa, kacuali ado saketek sarupo batu basurek nan di Batusangka tu.
Mungkin dunsanak2 jo inyiak-inyiak ado nan tahu arati tulisan di batubasurek
tu? nan bisa dibagi ka kito-kito ko!
Nan kito nan mudo-mudo ko sangaik auih tentang Tambo-Tambo yang bisa
dijadian bacaan salain nan alah disabuik-an sabalunnyo.
Marilah kito babagi kisah tentang adaik dan sejarah Urang Awak di Palanta
Lapau ko. Indak baitu dek Inyiak Suguik tu a?
Wassalam
Marven
-----Original Message-----
From: [EMAIL PROTECTED]
[mailto:[EMAIL PROTECTED]]On Behalf Of Sjamsir Sjarif
Sent: Wednesday, August 23, 2000 9:37 AM
To: [EMAIL PROTECTED]
Cc: Slamet; Dick Tito; Biaro
Subject: Re: [Rantau-Net] Asal-Usul Urang Minang
Maa Angku Marven sarato Rang Lapau nan Basamo,
Samantaro Carano sadang balega,
siriah nan sadang dikunyah-kunyah,
Inyiak Sunguik jawek salam dari Angku Marven,
Salam balega ka Nan Basamo nan Adang Adok di Lapau nangko.
Manuruik pandangan Inyiak Sunguik,
di dalam Adaik Minangkabau
dek Sarak jo Adaik samo dipakai,
kato "sambah" di dalam Caro Awak,
satidak-tidaknyo ado duo aratinyo:
Aso, "sambah" dalam arati manyarahkan diri kapado Tuhan,
manyambah kapado Allah saroman kito lakukan dalam Shalat
atau dalam "sumbayang" Caro Awaknyo.
Itulah sambah di dalam Sarak.
Duo, "sambah" dalam arati maantakan kato dalam karapatan,
manuruik caro-caro nan tatantu di dalam "alua pasambahan",
caro babicaro di dalam adat manuruik garih jo balabeh,
manuruik alua jo patuik, manuruik bunyi nan kadangaran
dalam karapatan adat "Sambah Manyambah",
antaro duo "Juaro Pasambahan" baganti-ganti, lega-balega,
biasonyo mawakiali "Si Alek" jo "Si Pangka",
mampalegakan kato ka Nan Basamo,
didanga di simak dek Sado nan Adang Adok.
Itulah "sambah" di dalam "Adaik Pasambahan".
Itu manuruik pandangan Inyiak Sunguik.
Inyiak mamintak ka Nan Basamo,
kok kurang tolonglah tukuak,
kok singkek tolonglah uleh,
kok salah tolong peloki,
dek Rang Juaro sado nan ado,
baiak di Lapau ataupun di Kampuang jo di Rantau.
Jo salam juo Inyiak antakan.
Alua kapado "asa jo usua"
tampaknyo ado duo pakaro nan ka dikaji:
Aso, asa usua Urang Minangkabau
Duo, asa usua Rajo-rajo di Minangkabau.
Alua kapado asa usua Urang Minang
susah rasonyo marantang panjang
basangkuik pauik jo asa usua manusia
banyaklah kaji tantang itu
kaji Urang Ahli nan alun putuih-putuihnyo
indak ka sadang diotakan di Lapau nangko.
Alua kapado asa Rajo-rajo di Minangkabau
dari Tambo ataupun Kaba
dalam barapo ragam nan kalua
batua lah samo kito danga
dari maso sunduik basunduik
dari Mamak ka Kamanakan
kadang-kadang tadanga pulo dek Nyiak Sunguik
saroman nan Angku katangahkan.
Limbak nan dari pado itu,
alua kapada Inyiak Aguang
nan bagala Sutan Iskandar,
atau tanamo jo Sultan Iskandar Zulkanaini,
di dalam Caro Inggirihnyo,
tanamo Alexander the Great,
Urang Gadang Basa Batuah,
Urang Bagak dalam Sejarah,
baikpun sati ataupun batuah,
marupokan tokoh maso dahulunyo,
ampia 24 ratuih tahun nan lah lalu.
Walaupun Inyo dari Makedonia,
ataupun ateh namo Banua Ruhum,
inyo lah mahampeh kaujuang jo kapuun,
mambawo tantara jo anak buahnyo,
sampai ka Babilonia ka Nagari Farsi,
lapeh pulo ka bateh nagari India,
mandapek lawan samo bagak,
tamusahualah parang ukatu itu,
sampailah jalannyo hinggo ka bateh.
Namun samantang pun baitu,
tuah jo satinyo alah tadanga,
manjadi sanjuangan maso itu
ataupun sijarah salanjuiknyo
tadanga dek rajo-rajo jauah di bateh.
Bak model kato Rang Kini,
bak gaya Caro Awaknyo,
banyak lah Rajo-rajo sabalah kaujuang,
bukan doh Rajo di Minangkabau sajo,
ingin maambiak Tuah ka Nan Manang,
maambiak conto ka nan sudah.
Indak doh dapek kito salahkan
karano baitulah Masodahulunyo,
Sutan Iskandar Rang Batuah,
Super Power kato Rang Kini,
manjadi model ka Rajo-rajo
tamasuak Rajo kito di Minangkabau ko,
banyak mangaku bakarik dakek,
banyak mangaku badunsanak,
untuak Mambangkikkan Tuah di Nagarinyo,
panambah gensi Isi Nagari,
panambah bangga Rakyat umunyo.
Baitulah pandangan Inyiak Sunguik,
pulang maalum ka Angku Marven
sarato Rang Lapau nan Basamo.
Sambah babaliak ka Juaro.
S
=================================================
Mailing List RantauNet http://lapau.rantaunet.web.id
Database keanggotaan RantauNet:
http://www.egroups.com/database/rantaunet?method=addRecord&tbl=1
=================================================
Mendaftar atau berhenti menerima dari RantauNet Mailing List, kirimkan email
Ke / To: [EMAIL PROTECTED]
Isi email / Messages, ketik pada baris/kolom pertama:
- mendaftar: subscribe rantau-net [email_anda]
- berhenti: unsubscribe rantau-net [email_anda]
[email_anda] = isikan alamat email anda tanpa tanda kurung
=================================================
WEB-EMAIL GRATIS ... @rantaunet.web.id ---> http://mail.rantaunet.web.id
-------------------------------------------------------------------------------------------------
WebPage RantauNet http://www.rantaunet.web.id dan Mailing List RantauNet
adalah servis dari EEBNET http://eebnet.com, Airland Groups, USA
=================================================
