[R@ntau-Net] Re: Pelok-i watak sajak ketek, dan barani mangakui kalabiahan urang lain

Tue, 25 Jul 2006 13:09:47 -0700

Waalaikumsalam w.w.
 
Ananda Hanifah Damanhuri dan para dunsanak,
 
1.  Ambo dapek marasokan baa bana bareknyo baban induak-induak dalam manangani rumah tanggo, nan manjadi unsur nan paliang dasar dari masyarakat. Apolagi saparati nan Ananda katokan, maso kini indak jarang induak-induak juo tapaso mancari nafkah di lua rumah. Karano itu ambo junjuang tinggi sabda Nabi Muhammad s.a.w., nan mangatokan bahaso kito haruih manghormati ibu kito tigo kali labiah banyak dari kito manghormati bapak. Ajaran itu salalu ambo ulang-ulang ka saluruh anak-anak ambo, laki-laki padusi.
 
Sahubuangan jo itu, saparati ambo tulih dulu, ambo juo maraso bahaso karano rumah tanggo adolah unit paliang dasar dari masyarakat, mako sasungguahnyo paralu diadokan parsiapan nan sungguah-sungguah, terancana, tarpadu,  bagi tiok urang nan ka barumah tanggo baiak bagi padusi maupun bagi laki-laki. Nan paralu diajakan bukan [sajo] tantang hubuangan suami isteri, tapi juo tantang hak padusi jo hak anak, nan dilindungi dek undang-undang, dan sairiang jo itu paralu dijaniahkan kawajiban dan tangguang jawab hukum dan moral dari laki-laki salaku suami dan bapak.
 
Salain itu paralu disadiokan wakatu untuk marancanakan iduik, nan rato-rato kini panjang umua sakitar 65 tahun, maliputi kurun balita, kurun remaja, kurun pemuda, kurun dewasa. dan kurun lansia. Paralu diingek, bahaso tiok urang akan malalui kurun-kurun iko, dan pado suatu saat nan samo, dalam suatu kaluarga akan tadapek babarapo kurun dari babarapo generasi sakaligus, generasi kakek-nenek, generasi anak menantu, dan generasi cucu. Kalau iko indak ditata elok, bisa tajadi konflik antar generasi.  Tamasuak dalam parancanaan iduik ko adolah adolah parancanaan karir antaro umua 22 sampai umua 55 tahun, nan marupokan karir partamo. Karir paratamo ko mamaralukan pendidikan dan pelatihan, kalau kito ingin maju dan dapek taraf iduik nan lumayan. Saparati kito katahui basamo, ongkos pandidikan jo palatiahan ko kini bukan main mahanyo, sahinggo bana-bana paralu dirancang dan dipasiapkan, apolagi kalau anak banyak. Saketek catatan, sasudah pansiun dalam umua 55 tahun, kalau badan masih sehat sajo jan sampai beleha-leha, beko capek pikun. Karano itu manuruik pandapek ambo, sasudah pansiun paralu distart karir kaduo, yaitu karir nan langsuang sasudah pansiun, bisa juo disambuang kudian jo karir katigo, dan kalau paralu karir kaampek. . Sakadar catatan tambahan tantang hal iko, ado adiak kanduang ambo nan samo sakali indak namuah marancanakan iduiknyo, karano bapacik ka doktrin: 'dima tibonyo sajolah'. Akibaiknyo, kini iduiknyo sabana bapetai-petai, anak banyak, awak sakik, pancarian indak ado. Tapaso digotong-royongkan dek kami dunsanak nan lain, nan juo barek dalam keadaan ekonomi nan indak bakatantuan kini. Jan sampai ado pulo di antaro dunsanak kito nan lain nan bapandirian 'dima tibonyo sajolah' ko, karano ugamo kito maajakan, utang di kito adolah bausaho jo baikhtiar, karano Tuhan indak ka maubah nasib suatu kaum kalau indak kaum tu sandiri nan maubahnyo. Ambo yakin sabda Ilahi tu juo balaku untuak urang surang-surang.
 
Dalam hubuangan iko, babarapo wakatu nan lalu, basamo jo rekan ambo para Komisoner Hak Perempuan dan Komisioner Hak Anak di komnas HAM, dan Bundo Hayatun di Jakarta, ambo babincang-bincang manganai kamungkinan diadokannyo pandidikan terpadu untuak calon marapulai jo anak daro. Kami sadonyo sapakaik untuak pado suatu saat mamprakarsai pandidikan tapadu ko, hanyo karano sajak itu ambo sabana puntang pantiang dek tugas lain, untuak samantaro gagasan ko alun ambo tindak lanjuti. Insya Allah sasudah bulan Agustus ambo agak luang wakatu, gagasan iko kan ambo taruihkan. Ambo marancanakan ka maajak organisasi-organisasi nan alah bagarak dalam kagiatan ko saroman Yasco, BKKBN, Departemen Agamo, LSM perempuan dan dan lain-lain nan takaik.Mungkin Ananda Hanifah baminaik, nanti kito pasamokan karajo gadang ko.
 
2.  Ambo raso Ananda batua tantang faktor panyabab susahnyo urang awak bakarajo samo. Parbedaan tingkat iduik jo status sosial jaleh akan manyulikkan komunikasi. Basamoan jo itu alah lamo nampak di ambo suatu gajala nan labiah mandasar sabagai panyabab suliknyo urang awak bakarajo samo, yaitu karano masyarakat Minang memang indak dirancang untuak basatu jo bakarajo samo, tapi untuak iduik sasuku-sasuku dan sanagari-nagari, sasuai jo kato papatah: 'adaik salingka nagari'. Dalam adaik kito, indak ado limbago nan basipaik 'supra nagari'.   Manuruik panglihatan ambo, untuang Islam masuak, sahinggo kito bisa maraso manjadi satu suku bangso dan dipasatukan dek ugamo nan samo, walau suku dan nagari asa balain-lain. Tapi lamo-kalamoan nampak pulo di ambo, bahaso walaupun alah mulai jadi satu, namun masih paralu labiah dipadukan antaro adaik kito jo ugamo Islam ko, karano ado bagian-bagian adaik kito tu nan alun pas bana jo ajaran ugamo Islam. Hal iko antaro lain dikamukokan dek Ananda Rahima Rahim. Wacana manganai masalah 'adaik basandi syara', syara' baandi kiabullah' (ABS SBK) ko alah mulai dibahas dalam milis Gebu Minang ([EMAIL PROTECTED]) dan kini dibuek bana milis baru [EMAIL PROTECTED]. Kalau Ananda baminaik, silaulah milis-milis ko.
 
3.  Tantang partanyaan Ananda menganai sipaik nan elok dari dunsanak kito suku bangso nan lain, dan babarapo sipaik nan indak elok dari urang awak. Ambo kiro sadonyo kito mancaliak kanyataan itu, nan babeda di antaro kito adolah ado nan barani mangakuinyo sacaro taruih tarang sarupo Ananda dan ado pulo nan indak amuah mancaliak kanyataan itu. Ambo tamasuak nan condong mangakui kanyataan, dalam arati mangakui kalabihan urang lain dan kalau paralu baraja dari sia juo nan memang ado kalabiahan; dan sacaro jujur mangakui kakurangan kito dan indak ragu mamelokinyo ateh kamauan kito sandiri. Sahubuangan jo iko, ambo mambukak diri untuak basahabat jo sagalo kalangan, indak pandang ras, suku, agamo, atau jenis kalamin. Pokoknya manusia dan akhlaknyo baiak. Sikap ko barangkali sasuai jo papatah kito: 'alam takambang jadi guru'. Ambo baguru ka sia sajo dan dari mano sajo.
 
Sakianlah daulu nan dapek dek ambo. talabiah takurang mohon maaf.
 
Wassalam,
Saafroedin Bahar
 
hanifah daman <[EMAIL PROTECTED]> wrote:
Ass Wr Wb Bapak Saafroedin  dan dunsanak di palanta kasadono yth
       
Tarimokasi banyak jo nasehat bapak dibawah gon
  
Ananda Hanifah, sakadar pamikiran awal, untuak mameloki sifat urang
awak nan kurang baiak, sabaiaknyo kito mulai dari pandidikan anak-anak
dalam kaluarga di rumah tanggo. Bararti peranan penting akan dipacik
dek kaum parampuan, nan manjadi 'ratu rumah tanggo'.
  
Untuak dapek mambangun dan mamfungsikan rumah tanggo sarato kaluarga
nan bisa mambantuak watak nan elok dari urang Minang, sarananyo kito
siapkan dahulu, yaitu salain rangkaian buku-buku patunjuak tantang
iduik bamasyarakat nan sasuai jo budaya Minang nan Islami, juo mambantuak
kader-kader pandidik nan mamanuhi syarat..

Bapak Saaf
  
Barek sangaik tangguang jawab induak-induak dijaman kami. Apoli
sabagian dari kami satolo kalua rumah mancari tambahan balanjo untuak
anak-anak. Kadang saketek wakatu untuak basuo jo anak-anak noh. Guru di
sekolah atau di TPA labiah banyak jadi panutan anak-anak ketimbang mama no. Anak-anak acok mangecekkan ... "kata guru begini....". Disampiang guru, anak-anak pun kadang-kadang baguru ka Sincan atau ka bintang kartun / bintang sinetron di TIPI nan jadi idolano. Lingkungan tantu gadang pulo pangaruahno. Nan bisa di lakukan bagi nanbaruntuang adolah mancari sikola / TPA nan babobot sabagai  salah satu alternatif untuak maantakan
anak-anak kamaso depan. Jadi ndak sado induak-induak bisa jadi " ratu
rumah tanggo nan ideal doh ". Baa lidu pak ??
  
Baliak awak dulu sacah tantang karajo samo rang awak di jaman dulu
dih. Nan takana di hanifah katiko ketek-ketek dulu dikampuang :
  1. Panen padi
  Indak ado nan baupahkan wakatu itu doh, nan manyabik jo mairiak padi
adolah dunsanak sendiri. Tapi saliang baganti . hari iko di sawah sia,
bisuak di sawah sia.  Tibo dikami anak-anak, musim panen adolah musim
nan paliang
mambahagiakan.    Karano bisa makan lamak disawah, maloncek loncek di
jarami bekas iriak, mambuek pupuik batang padi dan main alang-alang.
  
2. Pesta
Sagalo karajo nan bahubungan jo pesta sarupo mamasak, indak ado nan
bapasan doh, sadono bakarajokan basamo samo. Lasuahlo karano sambia
bakarajo, induak-induak maota kian kamari atau bakucindan dll.  
Jadi kalau dikecekkan urang awak indak pandai bakarajo samo, rasono
salah pulo.
 
Tapi kalau dipikia-pikia / dikana-kana dan bahkan nan sadang dijalani,
karajo samo rang awak umumno tajalin dek sanasib (salevel). Katiko
level indak samo li, baru urang awak baiak nan dirantau maupun nan
dikampuang banyak nan indak pandai bakarajo samo. Ado nan pandai kaateh, tapi indak pandai kabawah dan sabaliakno. Saketek nan pandai kaateh jo kabawah noh. Nan diateh jarang namuah mangayomi nan dibawah. Umumno jalan surang. Ndak bisa lo disalahkan kadang-kadang, karano suku lain (jawa) labiah loyal dibandiangkan suku awak (maaf yo pak saaf , tantu bapak nan labiah tau). 
   
Hanifah paratian pulo dintampek bakarajo tantang sipaik rang jawa.
Nan nampak di hanifah saroman iko ha:
  1. Rang jawa nan menutupi kelemahan / aib kawan sendiri.
  2. Membesarkan kelemahan orang lain yang jadi lawannya
  3. Membesarkan kelebihan kawan sendiri
  4. dan berusaha mengecilkan kelebihan orang lain.
  5. Sama dengan batak, jawapun punya jaringan yang sangat rapi dan
tertutup. 
   
Sekarang batak dengan kecerdasan kelihaian, kelicikan dan kekompakkan,  mereka bisa menyaingi jawa dan mengalahkan suku minang. Padahal dulu rang minang terkenal ahli strategi, makono banamo Minang.
Jadi manuruik hanifah, disampiang maninggakan sifat urang padang nan
indak elok, urang padangpun harus ahli strategi juo baliak.
Bagaimana menurut bapak Saaf?
Kalau setuju, apa langkah-langkahnya menurut bapak?

Itu sen dulu, talabiah takurang mohon maaf
  
  Wass
  
  Hanifah Damanhuri
 

 
How low will we go? Check out Yahoo! Messenger’s low PC-to-Phone call rates.
How low will we go? Check out Yahoo! Messenger’s low PC-to-Phone call rates.
--~--~---------~--~----~------------~-------~--~----~
*** Palanta RantauNet *** (cadangan)

Berhenti (unsubscribe), kirim email: [EMAIL PROTECTED]
Konfigurasi lain di: http://groups.google.com/group/RantauNet

Webmail Mailing List, daftar dulu di: https://www.google.com/accounts/NewAccount
-~----------~----~----~----~------~----~------~--~---

Kirim email ke