Sanak Palanta, Takaik jo diskusi kito, peran Datuak/mamak masso kini, kito simak tulisan Budayawan kito, Wisran Hadi di bawah, nan ambo upload dari padang ekspress.
Salam Is St Marajo, 39+ www.cimbuak.net Kampuang nan jauah dimato dakek dijari YO LAI BAMAMAK JUO AWAK LAI Minggu, 06-Januar1-2008, 12:05:57 Telah dibaca sebanyak 11 kali Sampai kini, Sabai Nan Aluih indak panah tau lai ko ado mamaknyo atau indak. Kok iyo lai ba mamak, tantu alah dicarikannyo laki si Sabai jak sari. Atau kalau paralu nyo gadai sawah dek mamaknyo tu supayo Sabai indak disabuik urang - gadih gadang indak balaki Sabab, manuruik adat Minangkabau ko, kalau tapaso kaadaan, mamak buliah manggadai tanah pusako untuk pambali laki kamanakannyo. Tapi tanyato sampai kini, indak ado urang juo nan babuek sarupo nan dimukasuik adat Minangkabau tu. Malah labiah suko mamak-mamak tu manjua daripado manggadai. Dulu, kutiko Rajo nan Panjang maminang si Sabai malalui bapak si Sabai nan banamo Rajo Babandiang tu, Sabai sabananyo takajuik. Batanyo-tanyo dalam hati, baa mangko langsuang sajo urang maminang ka bapaknyo, indak ka mamaknyo. Kutiko Rajo Nan Panjang lah mati ditembak si Sabai, indak pulo ado urang jadi mamaknyo nan manyalasaikan persoalan tu. Polisi indak, jaksa apo lai, kununlah pulo hakim-hakim. Untuang tukang kaba lai sayang ka si Sabai, mangko persoalan pembunuhan Rajo nan Panjang tu dapek disalasaikan. Kini, ado sajo urang mangaku sabagai mamak si Sabai. Nyo pacaliak an pulo ranji bagai. Si Sabai ragu. Iyokoh urang tu mamaknyo atau indak. Dek indak tahu baa maadok i persoalan tu, inyo imbau molah adiak kanduangnyo, Mangkutak Alam. Manolah adiak Ai Mangkutak Alam. Takana dek Ai kito baduo ko lai bamamak atau indak? Indak. Baa jaleh di waang? Kutiko apak kito mati di bunuah Rajo Nan Panjang, indak surang juo urang nan namuah mangaku sebagai mamak kito. Kalau indak dek ibo si tukang kaba, mungkin kito lah mati tagak. Baa mangko itu bana nan kak Sabai tanyokan? Ado urang baru pulang dari rantau mangaku sebagai mamak kito. Ha? Mamak kito? Agak hati den, urang tu pangicuah. Atau nak mintak gala, saroman banyak urang nan mintak-mintak gala datang ka Minangkabau kini ko, jawek Mangkutak. Saburuak tu bana sangko waang ka urang nan pulang dari rantau.. Mulo-mulo mintak diakui sebagai mamak. Sudah tu nyo buek ranji, nyo masuak an namonyo. Sudah tu nyo kuasai tanah pusako awak. Sudah tu, awak takalok, tanah awak dijuanyo. Gala datuak awak diambiaknyo. Banyak nan sarupo tu kajadiannyo kini. Tapi nyo kecek an dek urang tu ka Ai, inyo pulang dari rantau nak maurus kamanakan jo kampuang halaman. Inyolah pewaris kanan kerajaan di Pikumbuah ko, kato Sabai. Mungkin urang tu bangkrut di rantau, atau lah pansiun indak ado kakok an lai, lalu pulang mancari panambah pokok galeh. Atau urang nan sadang maintai pusako harato karun nan ditinggakan dek bapak awak, jawek Mangkutak. Ondeh diak oi, baa kok saburuak itu bana anggapan waang ka urang tu. Manolah aciak Sabai janyo denai. Mang lah pasai jo kalakuan ninik mamak kini. Mamak si Lepong, mamak si Burin, mamak si Gogeh tiok hari batangka jo kamanakannyo pakaro manjua tanah, basitegang urek lihie pakaro ka sia gala tu diwarihkan isuak. Dek sayang si mamak ka babini mudo, tanah pusako dijuanyo. Anak mamak nan ka balaki, tanah pusako kaum bagadaian. Minantu mamak tu ka mambali oto, tanah pusako kaum juo nan tandeh. Pasai den mandanga kalakuan ninik mamak tu, pasai. Kok iyo urang tu mamak kito pulo, tantu ka sarupo itu pulo kalakuannyo. Untuang kito indak bamamak. Kok bamamak, mungkin awak kini tingga namo sajo lai. Nan tanah pusako, harato bando, rumah gadang, sawah ladang alah abih tandeh dipajuabalikan dek mamak tu. Jadi, manuruik waang Mang, rancak awak indak ba mamak? Rancak. Jadi baa tantangan urang nan mangaku mamak kito tu? Jaan jaan inyo saroman Rajo Nan Panjang pulo. Inyo nak manjadian aciak bininyo. Bini kontrak. Kawin mutah! Apo kecek waang? Ai nak ka dijadikan bini mudonyo? Kawin kontrak? Baa, ka Ai tembak sakali lai urang gaek saroman tu? Tapi badia aciak nan panembak Rajo nan Panjang tu lah diambiak dek tukang kaba. Ditembak jo apo lai? Katuju dek aciak keluarga awak dituduh teroris? Ampun den ciak. Paniang den manyalasaiannyo beko. E, Mang. Antah iyo bagai inyo mamak kito. Siapo tahu?Mangkutak takangkang dek galak. Sudah tu inyo pai main alang-alang ka tanah lapang. Si Sabai tamanuang surang ditapi janjang. Inyo ragu. Inyo bapikie surang, iyo lai ado untuangnyo ba mamak di zaman kini atau ka manjadi baban sajo? (WH) --~--~---------~--~----~------------~-------~--~----~ =============================================================== Website: http://www.rantaunet.org =============================================================== UNTUK SELALU DIPERHATIKAN: - Selalu mematuhi Peraturan Palanta RantauNet lihat di http://groups.google.com/group/RantauNet/web/peraturan-palanta-rantaunet - Hapus footer dan bagian yang tidak perlu, jika melakukan reply. - Posting email besar dari >200KB akan di banned, sampai yang bersangkutan menyampaikan komitmen akan mematuhi Tata Tertib yang berlaku. - Email attachment, DILARANG! Tawarkan kepada yang berminat dan kirim melalui jalur pribadi. =============================================================== Berhenti, kirim email kosong ke: [EMAIL PROTECTED] Webmail Mailing List dan Konfigurasi teima email, lihat di: http://groups.google.com/group/RantauNet/subscribe Dengan terlebih dahulu mendaftarkan email anda pada Google Account di https://www.google.com/accounts/NewAccount -~----------~----~----~----~------~----~------~--~---