Mak Asmardi Arbi nan basuku Kampai nan salimbago jo suku Bendang, Malayu sarato Mandahiliang sarato angku, mamak, bundo jo dunsanak sapalanta nan ambo hormati.
Tatanan adat di nagari-nagari nan ado di rantau ko iyo agak balain, dimano pado masing-masing pangulu mamiliki pulo rajo disatiok nagari, hal iko juo tajadi di Piaman Laweh dimano pado satiok suku dbawahi oleh seorang rajo nan manguasai wilayah nagari-nagari di rantau ko. Rajo ko ado nan marupokan urang kuek/bakuaso di wilayah rantau, adopulo nan datang dari keluarga Pagaruyuang. Khusus untuak rajo nan di Kambang, barasa dari Alam Surambi Sungai Pagu nan juo barajo-rajo. Saroman nan alah disabuik cako, urang ampek jinih ko adolah pangulu, manti, malin jo dubalang nan marupokan sistem nan alah ado labiah daulu pado tatanan masyarakat di nagari-nagari. Kudian kutiko Islam bakambang di seantero ranah minang, pado niniak mamak ko batambah fungsi dari malin nan sasuai jo syarak nan basandi ka Kitabulla sahinggo ado nan disabuik urang jinih nan ampek, nan mangurus tatanan agamo di nagari-nagari nan sentralnyo ado di masajik nagari. Tantunyo fungsi qadhi, imam, bilal sarato khatib indak bisa dirangkap oleh manti surang sajo. Iko nan tasabuik di alam minangkabau sakali aie gadang sakali pulo tapian barubah. Kedatangan Islam manyamparonokan tatanan adat minangkabau itu sendiri. Balain kaji antaro lareh Koto Piliang jo Bodi Caniago, nan sajak paratamo mengalami konflik dalam caro maambiak jalan manuju musyawarah jo mufakat sarato kedudukan masing-masing pemangku adat/niniak mamak dalam suatu nagari. Unsur feodal labiah kuek taraso pado lareh Koto Piliang, dimano bajanjang naiak batanggo turun ko dalam Islam kurang masuak kajinyo, sabab ado terjadi pelapisan sosial dalam masyarakat di nagari. Baitu pulo dengan mawarihkan sako adat nan ado, maninjau kapado tali darah nan labiah dakek katimbang siapo nan labiah patuik dalam mamacik tangguang jawab manjadi pamimpin dalam suatu urusan, baiak sebagai pangulu, manti, malin, dubalang, qadhi, bilal, imam sarato khatib. Hal iko babandiang tabaliak jo lareh Bodi Caniago nan labiah mautamokan kebersamaan, siapo nan labiah patuik untuak tangguang jawab mamacik amanah nan ko. Lareh Koto Piliang, Lareh Bodi Caniago ataupun kombinasi dari nan kaduo mantun nan disabuik pisang sikalek-kalek hutan pisang timbatu nan bagatah indak bisa kito klasifikasikan dalam suatu wilayah luhak, kabupaten ataupun ciri balai adat sajo. Baa kok bitu, sabab tasabuik Luhak Agam ko manganut paham Bodi Caniago, namun nyato-nyato nagari Kurai ko bapaham Koto Piliang. Basabuik Luhak Tanah Datar ko Koto Piliang, nyato-nyato di Limo Kaum ko sentral Bodi Caniago. Sebagai contoh nan labiah konkrit, nagari Tanjuang nan marupokan nagari asa pak Abraham Ilyas, kutiko ambo tamui ketua KANnyo,baliau manyabuikan nagari mantun manganut paham Bodi Caniago, namun kutiko kito amati caro banagarinyo, labiah kental bapaham Koto Piliang. Sapanjang nan ambo caliak pado nagari-nagari di ranah minang, nagari nan bapaham Koto Piliang ataupun pisang sikalek-kalek hutan pisang timbatu nan batagah nan labiah condong pado paham Koto Piliang, nan paliang banyak tajadi kevakuman dalam pelaksanaan tatanan adat. Kasus punah pado nagari-nagari nan ko menjadi polemik nan tersendiri nan sabana rumik untuak mancarikan jalan kaluanyo. Baa kok bitu? Hal iko bukan kapado permasalahan pawarisan pusako tinggi, namun labiah kapado pewarisan sako nan takadang pado kaum nan mamacik sako pangulu pucuak tu bana nan terancam dalam kasus punah. Ibaraik kaji lapau di palanta, ado sabuah bus malam nan operatornyo tadiri dari 3 personil, yaitu supir 1, supir 2 sarato stokar. Kutiko supir satu wafat, supir duo indak bisa menjadi supir 1 sabab balainan kaum nan indak saparuik sabab hanyo sajurai ataupun sasuku nan alah memiliki sako pangulu andiko sendiri. Apokah hal iko bisa dicari solusinyo? Di Minangkabau ko alah disabuik dalam pepatah adat sakali aie gadang, sakali pulo tapian barubah, suatu konsensus bisa dilakukan pabilo anak kamanakan sarato niniak mamak pemangku adat di suatu nagari melakukan suatu rundiangan adat untuak melakukan suatu amandemen nan bisa memperbaiki tatanan adat manjadi labiah samparono, sabab adat ko inyo babuhuan sentak. Hal iko bisa kito caliak pado urang jinih nan ampek nan sabalun indak ado dalam tatanan adat, kudian masuk dalam tatanan adat itu sendiri. Dari duo point nan alah basampaikan, yaitu urang jinih nan ampek sarato lareh nan ado di ranah minang, ado ciek lai nan takadang basamek-samekan pado tatanan adat nan ko. Apo nan ka tigo ko? yaitu posisi rajo di ranah minang. Ambo mohon maaf pabilo hal iko indak berkenan di hati angku, mamak, bundo sarato dunsanak sapalanta. Baa kok bitu? Sabab posisi rajo nan kini disabuik rantau saroman di Pasaman, Pasaman Barat, Piaman Laweh, Pasisia Selatan, Solok Selatan, sabagian Sijunjuang sarato Dharmasraya ko statusyo indak pulo jaleh. Baa kok bitu? Rajo-rajo nan daulunyo bakuaso di Piaman Laweh marupokan perwakilan dari Pagaruyuang. Baitu pulo nan di Kinali, Parik Batu, Talu, Aia Tonang, Sundata, Lubuak Tarok, Alam Surambi Sungai Pagu sarato wilayah Pasisia Selatan mulai dari IV Jurai hinggo ka Kambang nan marupokan bawahan dari Alam Surambi Sungai Pagu. Sabab sajak maso-maso ka berakhirnyo parang padri dimano diadokan pertemuan Bukik Marapalam tacapai suatu konsensus satantang status dari Tigo Tungku Sajarangan yaitu Rajo Alam, Rajo Adat sarato Rajo Ibadat indak bisa ditaruihkan dek karano warih nan bajawek tu bana nan alah putuih. Baa kok bitu? Sabab adat pado Rajo Nan Tigo Selo ko babeda jo sistem pewarisan nan ado di nagari-nagari, dimano pado nagari-nagari jalur pewarisan sako jo pusako memakai pola matrilineal sadangkan pado rajo-rajo nan ko memakai pola patrilineal. Dari katigo rajo nan tigo selo ko indak memiliki suku, nan babeda ko urang minang sendirnyo nan pasti basuku jo bapusako. Baa kok indak tajadi warih nan bajawek mantun? Sabab katurunan laki-laki dari Rajo Nan Tigo Selo ko bana nan indak ado lai, sahinggo warih nan bajawek indak bisa ditaruihkan. Walaupun baitu, hinggo kini banyak dari keluarga keturunan Pagaruyuang nan selalu manyabuikan "adat rajo turun tamurun, adat puti sunduik basunduik". Realita nan ko nan manjadikan alasan menarik garih katurunan nan punah dari garih puti. Hal iko dari kacomato ambo pribadi labiah bersifat dalam kepentingan politis nan indak ado hubungannyo jo tatanan adat di nagari. Mungkin hal iko bisa mambuek kaniang dunsanak kito manjadi bakaruik, tarutamo pabilo mancaliak sapinteh lalu pandangan ambo pribadi terhadap pagaruyuang. Namun ado baiaknyo, angku, mamak, bundo sarato dunsanak sapalanta bisa manyigi labiah lanjuik apo sabananyo nan dihasilkan dari sumpah satie bukik marapalam nan ko. Salah satu caro nan paliang mudah, adolah mangumpuakan niniak mamak pemangku adat dari 3 kanagarian dimano tampek Rajo Nan Tigo Selo ko basumayam, sahinggo bisa pulo kito danga apo warih nan bajawek turun tamurun dari pemangku adat terdahulu kapado generasi salanjuiknyo Dek karano itu, paralu dipikiakan oleh dunsanak saranah minang nan barasa dari nagari-nagari nan daulunyo disabuik sebagai wilayah rantau, dimano pado era otonomi daerah kini, kedudukan nagari-nagari di wilayah rantau memiliki kedudukan yang sama dalam tatanan adat minangkabau yang mengatur masyarakat adat dalam suatu nagari. Luhak nan tigo lebih bersifat sebagai daerah asal dari nagari-nagari rantau, dimano pado satiok nagari di ranah minang memiliki kedudukan nan samo untuak mengurus sendiri tatanan masyarakat adatnyo, nan basako jo bapusako dari tingkat terkecil, mulai dari paruik, jurai, kaum, suku hinggo ka nagari. Sabab ijan sakali-sakali baharok sisiak ka limbek, sabab nan bisa mampasegeh tatanan adat di nagari hanyo anak nagari itu sendiri, baiak nan di kampuang maupun nan di rantau untuak mampasamokan apo nan patuik dipasamokan di tampek babulek baurek tunggang, dimano pado tanah asa kito basako jo bapusako. Ambo kiro, sebagai urang minang nan menganut ajaran Islam, kito menyadari bana bahasonyo pemimpin lahir karano dibaiat oleh masyarakat nan akan dipimpinnyo, bukan berasa dari garis darah atau garis keluarga dimano hal nan ko labih mirip kapado kebudayaan hindu nan berkasta-kasta. Sakali aia gadang, sakali pulo tapian barubah, kedatangan Islam memberi warna baru dalam tatanan adat minangkabau. Baitulah angku, mamak, bundo sarato dunsanak sapalanta pandapek nan bisa ambo sampaikan, labiah jo kurang mohon dimaafkan sabab nan bana iyo datang dari Allah azza wajalla nan salah tibo dari ambo manusia nan mahluk dhaif ko. wasalam AZ/lk/34th/caniago Kubang, sadang di kampuang babako ka Canduang Koto Laweh, Agam Mak Asmardi, tantu mamulai dari lingkup nan labiah ketek daulu, dari paruik ka jurai, lalu ka kaum kudian ka suku sahinggo kato mufakat sampai di nagari. Pado maso kini,organisasi perantau adolah komponen penting dalam sistem pemerintahan nagari, mungkin bisa mamak paiyokan daulu babiliak ketek jo pituo-pituo di rantau talabiah dahulu, kudian dikomunikasikan sacaro badunsanak jo pemerintahan nagari bsasarto seluruh stake holdernyo. Usah risau pabilo 'rumah gadang' nan kito ansua alun salasai dek umua kito nan singkek ko, nan jaleh kito alah mausahokan tahapan nan rancak untuak ditaruihkan generasi salanjuiknyo, sabab karajo elok ko indak akan pernah baranti hinggo dunia wale ko barakhia. Indak ado malang samalang nan ko, indak ado mujua samujua nan ko karajo elok rancak dipacapek, nyampang kok tibo nan buruak karajo buruak rancak dipalambek, kok katibo nan elok. ________________________________ Dari: Asmardi Arbi <asmardi.a...@rantaunet.org> Kepada: rantaunet@googlegroups.com nan ado Dikirim: Kamis, 9 Agustus 2012 22:15 Judul: Re: Bls: [R@ntau-Net] Mari kito mangaji (28) Nakan Armen nan pro aktif dan kreatif sarato dedikatif, Buliah mamak batanyo ciek, apo beda nyo "urang nan ampek Jinih" jo "urang Jinih nan ampek"? Di Pasisia nan mamak tau hanyo istilah Urang nan ampek Jinih, baiak ditingkat Nagari, Suku jo kaum. Khusus di Nagari Kambang , sagalo katantuan/tatacara Adat ado di Monografi Adat Nagari Kambang. Soal lareh nan bapakai , tatulih "Adat Koto Piliang Langgam Budi Chaniago" Kecuali intern suku Tigo Lareh, Adat jo Langgam Budi Chaniago Dalam babarapo acara adat di Kambang masih nampak pelaksanaan musyawarah mancapai mufakat , nan sistemnyo bajanjang naiak batanggo turun, misalnyo dalam acara manatapkan Rajo Adat, Pangulu Ikek, Pangulu Pucuak, Pangulu Sandi dan Pangulu Kaum. Demikian pulo dalam acara kematian, perkawinan dsb. Sajak adonyo Kerapatan Adat Nagari Peran Lembaga Adat memang tidak lagi berfungsi, terutama dalam soal-soal pamarentahan,pembangunan jo kemasyarakatan dalam Nagari, perangkat Urang Ampek Jinih jo Tigo Tungku Sajarangan indak nampak, Wali Nagari nan dulu dipacik Rajo Adat, dipiliah indak badasarkan adat, Monografi Adat Nagari nan cukuik lengkap pedomannyo indak dipedomani lai sapanuahnyo, Pangulu nan diangkek umumnyo indak mamanuhi syarat, indak manguasai Adat istiadat, tidak menguasai/mengenal ulayat jo anggota kaum, kurang religius, kurang wibawa dst. penyebabnya banyak sekali, nan cadiak2 banyak dirantau, nan dikampuang tingga nan miskin, kurang ilmu , ndak bisa jadi panutan, pangulu ado nan dirantau jarang pulang, panungkek susah dicari urangnyo, anggota kaum banyak taserak jo susah mangumpuakan dst., Itulah sekedar gambaran singkek situasi jo kondisi Nagari kami. Dari ma kamamulai managakkan ABS-SBK, Mamak alah maagiah buku Pedoman Pengamalan ABS-SBK ka KAN jo ka 4 Wali Nagari Kambang, maagiah pangarahan, tapi alah satahun indak ado perkembangan , antah lai dibaco atau indak buku itu. Wassalam, AA /090812/ 71-, Kampai, Tangsel. -- -- . * Posting yg berasal dari Palanta RantauNet, dipublikasikan di tempat lain wajib mencantumkan sumber: ~dari Palanta R@ntauNet http://groups.google.com/group/RantauNet/~ * Isi email, menjadi tanggung jawab pengirim email. =========================================================== UNTUK DIPERHATIKAN, melanggar akan dimoderasi: - DILARANG: 1. E-mail besar dari 200KB; 2. E-mail attachment, tawarkan di sini & kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://forum.rantaunet.org/showthread.php?tid=1 - Tulis Nama, Umur & Lokasi disetiap posting - Hapus footer & seluruh bagian tdk perlu dlm melakukan reply - Untuk topik/subjek baru buat email baru, tdk mereply email lama & mengganti subjeknya. =========================================================== Berhenti, bergabung kembali, mengubah konfigurasi/setting keanggotaan di: http://groups.google.com/group/RantauNet/