--- In [EMAIL PROTECTED], hanifah daman <[EMAIL PROTECTED]> wrote:
>
Assalamu 'alaikum Warahmatullahi Wa barakatuh,
Dunsanak Hanifah, yang dimuliekan oleh Allah,
Melah nyo barih dek pangulu
Nan mudo utang mamakai
Kok lah janiah aia di ulu
Tando muaro kasalasai
Barieh balabeh Minangkabau, sanitiak tiado hilang, sabarih bapantang
lipua, di nan salilik gunuang Marapi, sa edaran Sago jo Singgalang,
salingka Talang jo Kurinci, sampai kalauik nan sabideh.
Di ranah Minangkabau, warih nan samo kito jawek, kato pusako nan di
ganggam, ka ateh ta ambun jantan, ka bawah ta kasik bulan, hak nyato
bapunyo, ganggam nyato ba untuak.
Salaruik salamo nangko, namo nyo kito urang Minang, dek ketek kurang
pangana, mungkin lah gaek aka pailang.
Kalau indak hati-hati, jalan bisa di aliah urang lalu, cupak dapek
di papek rang panggaleh.
Mungkin dek elok kilek loyang nan datang, intan tasangko kilek kaco.
Atau di sangko bulek daun nipah, kiro nyo picak ba pasagi.
Bisa jadi, di liek lipek ndak barubah, di kambang tabuak tiok ragi.
Nah, dunsanak Hanifah, pado wakatu iko kini, lalok sakalok ba
rasian, pikia nan palito hati, nanang nan baribu aka.
Karano, dalam tanang bana mandatang, paham tibo aka baranti, bana
lah timbua sandiri nyo, arah kamudi di samoan. Jikok padoman di
batua an, adaik jo syarak di pagang taguah, samo mancinto ka nan
baiak, kok indak tajajak juo tanah tapi, indak kudaraik dari kito,
hanyo kuaso dari tuhan.
Kasimpulannya, sasek suruik talangkah kumbali, pulang nyo ka balabeh
juo. Baitu adaik nan bapakai. Kok sasek di ujuang jalan, ba baliak
ka pangka jalan.
Kito pilieh jalan nan luruih, barundiang jo niniak mamak, sarato an
nan tuo jo cadiak pandai, langkok an jo imam jo tuangku, baok sato
nan mudo arih budiman, jo bundo kanduang samo di dalam.
Asa lai duduak jo mupakaik, nak dapek bulek nan sagoloang, nak
buliah picak nan salayang, sa ukua kito nan basamo, kito babaliak
mampaelok i ko ado nan lah rusak, jo syarak mangato adaik mamakaikan.
Baitulah nan takana dek buya, nan urang agam ko, di baliek ngarai,
anak urang surau lakuak di kotogadang.
Bismillah kito muloi mampaelok...
Wassalam,
BuyaHMA, rang gaek 74.
--~--~---------~--~----~------------~-------~--~----~
===============================================================
UNTUK DIPERHATIKAN:
- Wajib mematuhi Peraturan Palanta RantauNet, mohon dibaca & dipahami! Lihat di
http://groups.google.com/group/RantauNet/web/peraturan-rantaunet.
- Tuliskan Nama, Umur & Lokasi anda pada setiap posting.
- Hapus footer & bagian yg tidak perlu, jika melakukan reply.
- Email attachment, DILARANG! Tawarkan kepada yg berminat & kirim melalui jalur
pribadi.
- Posting email besar dari >200KB akan dibanned, sampai yg bersangkutan minta
maaf & menyampaikan komitmen mengikuti peraturan yang berlaku.
===============================================================
Berhenti, kirim email kosong ke: [EMAIL PROTECTED]
Daftarkan email anda pada Google Account di:
https://www.google.com/accounts/NewAccount?hl=id
Agar dapat melakukan konfigurasi keanggotaan di:
http://groups.google.com/group/RantauNet/subscribe
===============================================================
-~----------~----~----~----~------~----~------~--~---
