Assalamu'alaikum wr. wb.
Disusun jadi nan sapuluah
Ditakuakan kapalo nan satu
Dihunjamkan lutuik nan duo
Ampun jo redha ambo pinto
ka bakeh ninaik mamak, alim ulama, cadiak pandai, bundo kandung, manti, malin,
dubalang, urang mudo. Kok ketek indak disabuik namo kok gadang indak disabuik
gala
Bak kecek urang juo lambek lago lai ka manang, alhamdulillah barakaik do'a kito
basamo, insya Allah tanggal 29 November 2008 atau tapekno hari Sabtu bisuak
rombongan pulang basamo ka mandaraik di lapangan tabang internasional
Minangkabau. Salain rombongan pulang basamo pado hari nantun akan tibo pulo
rombongan pertukaran pemuda/pelajar antaro Singapur dan Sawahlunto sarato
rombongan MUIS (Majelis Ugama Islam Singapura) nan ka maado-an conference di
Bukittinggi. Jadi ado sekitar 100 urang masyarakaik Singapura nan ka manikmati
keindahan alam, keunikan budaya dan keramahan masyarakat Minangkabau nan tanamo
baik budi indah bahaso sarata berlandaskan Adat basandi syarak, syarak basandi
kitabullah. Urang Minang nan haluih tutua kato, manih budi bahaso tantu alah
siap mananti tamu nan ka datang ko, karano urang kito adalah msyarakaik nan
sangaik mamuliakan tamu sahinggo kita manyadiokan lumbuang padi nan banamo
sitinjau lauik panjamu tamu nan datang.
Alangkah elok rono dan rupono kalau saandaino dimuloi dari pintu kaporo ranah
Minang nan banamo Bandara International Minangkabau ko mereka disambuik jo hati
nan suci muko nan janiah sarato sanyun nan taruih malakek dibibia. Bialah
saketek awak baminyak aia, harimau di dalam paruik kambiang juo kaluakan.
Muluik manih kucindan murah alah cukuik tu panyajuak hati tamu nan tibo indak
paralu bana sirih dicarano atau tari galombang. Walaupun indak kamnukuak
manambahi sakurang2 no mereka ko ka mambalanjokan dolar no di kampuang kito,
tolong mambana ambo jaan lah mereka ko dipakuak-i, agiahlah mereka ko arago nan
bapatuik-an. Bagi mereka nan berprofesi sabagai calo, tukang pakang, tukang
pakuak, pareman pasa, tukang copet dll tolong barantilah berprofesi sakurang2
no salamo ukatu nantun, karano malu awak tacoreang biko arang dikaniang nan bak
kecek urang juo
bukanlan alu sa alu nangko
alu tataruang nan di tabiang
kok tatarung nan di lasuang
bisa mancaruah galu galu
bukanlah malu samalu nangko
arang tacoreang nan dikaniang
kok tacoreang di pungguang
bisa ditutuik jo kain baju
Dek karano nila satitiak rusak susu sabalango, dunia kini adolah kampuang
global nan indak ado tapal bateh lai, kalau saandaino tamu awak ko kecewa
yakinlah baritano akan sampai kasaluruah panjuru dunia bahkan sampai ka
Timbuktu. Pasti dan pasti mareka ko ka maharamkan manjajak ranah mInang baliak
dan ka maajak kawan2, kolega, sanak sudaraono untuak malakukan boikot. Tapi
kalau awak bisa mambarikan pelayanan nan tabaiak, ambo yakin akan banyak tamu2
nan ka datang manikmati ranah Minangkabau.
Sakali lai dengan sagalo kerendahan hati ambo maminta kapado saluruah
stockholder baiak angku palo, anggota volksraad, laandrad, upeh, saradadu,
sudaga, pareman, parewa, manti, dubalang, niniak mamak, alim ulam, cadiak
pandai, bundo kanduang, urang mudo, rakyaik badarai marilah kito sambuik tamu2
awak ko jo sapo, senyum, layan.
Banyak ma'af
Wassalam
Junaidi Ml. Basa (42), kandang singo
Ketua rombongan Lion City Pulang Basamo 2008
--~--~---------~--~----~------------~-------~--~----~
===============================================================
UNTUK DIPERHATIKAN:
- Wajib mematuhi Peraturan Palanta RantauNet, mohon dibaca & dipahami! Lihat di
http://groups.google.com/group/RantauNet/web/peraturan-rantaunet
- Tulis Nama, Umur & Lokasi anda pada setiap posting
- Dilarang mengirim email attachment! Tawarkan kepada yg berminat & kirim
melalui jalur pribadi
- Dilarang posting email besar dari >200KB. Jika melanggar akan dimoderasi atau
dibanned
- Hapus footer & bagian tdk perlu dalam melakukan reply
- Jangan menggunakan reply utk topik/subjek baru
===============================================================
Berhenti, kirim email kosong ke: [EMAIL PROTECTED]
Daftarkan email anda yg terdaftar pada Google Account di:
https://www.google.com/accounts/NewAccount?hl=id
Untuk dpt melakukan konfigurasi keanggotaan di:
http://groups.google.com/group/RantauNet/subscribe
===============================================================
-~----------~----~----~----~------~----~------~--~---
