Assalamu'alaikum w.w. Hari Sabtu lalu ambo pulang ka Bukittinggi dek ka batamu jo sales supervisor Garuda Padang. Sabalum baliak ka Pakanbaru singgah sabanta ka pasa Aua Kuniang ma antaan urang rumah babalanjo. Sambia manunggu urang rumah, ambo sempatkan ma ajak bacurito salah satu pedagang nan manggaleh busana Muslimah. Dt. Majo Indo gala beliau urang Tilatang Kamang. Alah labiah limo baleh tahun manggaleh di Aua. Dari ampia satangah jam bacurito nan jadi perhatian dek ambo adolah keluhan pak Datuak satantang alah mulai bakurangnyo urang babalanjo ka pasa grosir kain nan paliang gadang di Sumatra. Ambo cubo batanyo kabaliau baa kok jauah bakurang? Spontan baliau jawab, " baa indak ka bakurang urang babalanjo, mulai dari urang manggaleh sampai ka tukang angkek. Banyak nan kasa-kasa." Caro manggaleh nan panuah keramahan cando urang sisuak indak adolai, nan ado caro kasa dan gaya macam urang indak ka manjua. Kalau ado urang maago inyo berang. Kok nampak lain bantuak urang nan datang, bahasonyo bukan asa urang awak harago lansuang malambuang tinggi. Indak jadi urang mambali ba cacek abih. Indak adolai nasihat urang tuo-tuo dulu nan mangatokan pambali adolah rajo." Ditambah kondisi pasa nan kumuah jo pedagang kaki limo nan basasak ditapi jalan sahinggo kendaraan payah lalu. Untuak parkir oto sajo susah.
Ambo hanyo tadiam tanpa mambantah dek pengalaman bantuak iko pun pernah awak rasoi. Dalam perjalanan pulang ka Pakanbaru bayak nan tapikia dek ambo. Sabananyo bukan hanyo sikap kurang ramah pedagang jo tukang angkek nan punyo andil Aua Kuniang samakin langang. Tumbuahnyo pusat perdagangan dikota-kota dilua Bukittinggi sarupo Pakanbaru, Ujuang Batu, Duri, Dumai, Perawang, Kerinci Pelalawan, Jambi dan kota kabupaten disekitarnyo, sarato kota-kota di selatan Sumatra Utara nan bakambang pesat dek banyak petani sawit nan alah barasaki. Dimano dulu banyaknyo pedagang dari kota-kota nan disabuik an diateh babalanjo ka Bukittinggi. Tarutamo dihari pasa Rabu jo Sabtu. Di Pakanbaru sajo dalam waktu duo tahunko pedagangan grosir sangat maju. Harago sewa toko nan ado di jalan Imam Bonjol sampai ka jalan HOS. Cokro Aminoto naiak malambuang. Ampia rato-rato di isi dek pedagang dari Bukittinggi, Padang jo Jakarta. Tantu ampia sadonyo urang awak. Mungkin kondisi ko bisa jadi buah pamikiran untuak calon walikota nan ka batandiang bulan Juni ko. Indak sekedar pelayanan wisatawan sajo nan acok dikeluhkan, pasa nan sebagai pusat kebanggaan urang awak pun alahmulai langang. Mari kito beri masukan, tando kito sayang ka Bukittinggi. Wassalam, Ibnu -- . Posting yg berasal dari Palanta RantauNet ini, jika dipublikasikan ditempat lain wajib mencantumkan sumbernya: ~dari Palanta r...@ntaunet http://groups.google.com/group/RantauNet/~ =========================================================== UNTUK DIPERHATIKAN, melanggar akan dimoderasi: - DILARANG: 1. Email besar dari 200KB; 2. Email attachment, tawarkan disini & kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://groups.google.com/group/RantauNet/web/peraturan-rantaunet - Tulis Nama, Umur & Lokasi pada setiap posting - Hapus footer & seluruh bagian tdk perlu dalam melakukan reply - Untuk topik/subjek baru buat email baru, tidak dengan mereply email lama =========================================================== Berhenti, bergabung kembali serta ingin merubah konfigurasi/settingan keanggotaan di: http://groups.google.com/group/RantauNet/subscribe
