....Sambungan dek indak sangajo lah tatuncik tombol send. Iyo indak batunggu lamo doh, salasai operasi mbo langsuang maluncua ka daerah 'karampang angin' alias gunuang sarik. Mbo pasanan bana ka kawan baso ambo iyo taragak bana babuko baselo caro kampuang. Mbo alah dapek kaba baso urang rumah kawan ko santiang mamasak, pandai manatiang, sagalo jagok. Alun adoh kawan nan makan di sinan nan indak cainan baliak. Kiniko mbo iyo ka mancubo pangalaman lamo nan alah ilang salamo hampia duo puluah tahun. '...makan lah malin ijan babaso pulo lai. Sado nan adoh tu iyo tuk di makan mah...'Baitu baso rang rumah kawan mbo tu. Alah abi nasi sapiriang layak, lauk puyu baitu pulo, adoh lo goreang baluik bacampu jo jariang, di tingkah pulo gulai pucuak ubi parancah bada masik. Ondeh mak...indak basiso ruang paruik lai doh. Nan ambo iyo indak adoh babaso bagai doh. Dek karano kawan mamak rumah ko konco palangkin salapik sakatiduran di surau balanti maso ketek2. Lah salasai makan maota gadang lah kami mulai carito mancik2 sampai carito serius nan bak awak pulo nan punyo kota Padang ko. Lambek lamo mulai tadanga bunyi koncek basahuik-sahuik, ditingkah jo suaro cingkariak sarato uwia2. Taraso bana dikampuang mbo dek tingkah bunyi2an ko. Alah pukua sabaleh malam, mbo ajak alah konco palangkin ko pai babega ka kota Padang. Mancalaik baa bana suasana malam di Kota Padang. Ambo diajak bakuliliang ka pasa raya darurat Padang nan alun juo salasai babangun. Arus lalu lintas iyo taraso agak aneh. Singgah lo ambo ka tampek kawan nan sadng manggaleh sipatu di jalan Permindo. Onde sanak langang jua bali kini kecek e. Alah ampiang rayo alun juo dapek tabaia THR karyawan lai kaluah kawan nan manggaleh sipatu ko. Panek maota nyo belok an lah oto dek pak jep si supir oto ka simpang kinol tampek wisata kuliner. Masih rami memang urang pukua duo baleh dinihari tu. Alah mbo pasan pulo soto, gado-gado jo sate simpang kinol. Baliak mbo maota-ota baliak carito maso sikola jaman sma inyak inyin nan makanan ko lai pulo abih. Kok raso memang alun takalahan masakan urang rumah kawan mbo nan di gunuang sarik 'Karampang Angin' lai. Antah hari alah malam, cuaca memang agak lindok pulo, salero mungkin alah mulai tabaok lalok dek ari alah laruik malam. Nan agak tacangang awak katiko mambaia. Kasir e disangko amai-amai kampuang rupo e indak pulo doh. Dibao caro awak nyo bae baso Indonesia Raya. Mbo tanyo dima kampuang, nyo asli simpang kinol. Kok dicaliak rono encik ko agak pitok mato e. Ondeh sansai lai. Badatak ati mbo, nan manggaleh ko urang awak dari tanah subarang mungkin anduang e masih di daratan tiongkok sinan. Mbo bae bana babaso glodok nan mbo bisa lai... Ehe alah tagalak sengeang si encik tu. Aha.."Ah nyo baso lo awak marokok agak sabatang. Mbo jawek se indak sambia maluncua pulang ka Karampang angin. Puku satu malam akhirnyo ambo mulai shalat isya, taraweh, manompang di rumah kawan nan masih di kaliliangan sawah, banda, jo banyak hutan. Taraso bana suasana kampuang malam tu. Antah jam bara mbo takalok, tau2 alarm BB ambo alah manjagoan awak puku ampek tuk kemudian kami sahur, sumbayang subuh dan siap2 tabang hambua baliak ka tanah betawi. Di ateh kapa tabang masih aduh siso akuak nan tabaok, takalok kalok ayam ambo di ketinggian sabaleh kilometer. Takana- kana makan di kinol nan induak samang e urang subarang, takana pulo makan lauk puyu nan baru taulang sasudah duo puluh tahun.. Tarimo kasih kawan...nan kampuang dari dulu iyo coitu juo. Antah pabilo ka maju e. Nan karampang angin tatap juo karampang angin. Nan toke tatap juo urang lua... Ondeh mak..pabilo lo awak ko jadi toke dikampuang suranggg.. (Salasai)
Rahyussalim Powered by Telkomsel BlackBerry® -- . Posting yang berasal dari Palanta RantauNet ini, jika dipublikasikan di tempat lain wajib mencantumkan sumbernya: ~dari Palanta r...@ntaunet http://groups.google.com/group/RantauNet/~ =========================================================== UNTUK DIPERHATIKAN, melanggar akan dimoderasi: - DILARANG: 1. E-mail besar dari 200KB; 2. E-mail attachment, tawarkan di sini dan kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://groups.google.com/group/RantauNet/web/peraturan-rantaunet - Tulis Nama, Umur dan Lokasi pada setiap posting - Hapus footer dan seluruh bagian tidak perlu dalam melakukan reply - Untuk topik/subjek baru buat e-mail baru, tidak me-reply e-mail lama dan mengganti subjeknya. =========================================================== Berhenti, bergabung kembali serta ingin mengubah konfigurasi/setting-an keanggotaan di: http://groups.google.com/group/RantauNet/subscribe.
