Ngobrol Kuring, Tatanen, jeung sabalang bentor
Bapak Kuring asli tukang tani. Ti saprak kuring sadar jadi jelema, bapak kuring geus tani. Tatanena rupa-rupa. Sainget kuring mah aya engkol (kitu tah ngabasakeun sesebutan), bortol, hui mantang atawa hui kentang, hui boled, jagong, bawang, cabe (cengek jeung kiriting), jeung tomat. Aya nu lain, sabangsaning cau jeung sampeu. Tapi leuwih kusabab geus aya wae di kebon, bari lain sektor "utama". Sok sanajan bapak kuring patani tule. Nepi ka kuring sakola SLTA, teu aya kahayang jadi siga pun bapak. Euwueuh kahayangna teh, leuwih ku sabab naon anu katenjo wae. Sabab, anu katinggali, ari tani teh bet asa loba rugina. Jorojoy aya kahayang kana bab tatanen, kira-kira rek tamat SLTA tea. Niat hade asana mah. Hayang ngomean dunya tatanen. Nya minimal, ngomean pun bapak meh teu rugi teuing. Ti dinya kuring neangan informasi. Geus apal, yen di Bogor teh aya IPB. Tempat neuleuman elmu tatanen. Jorojoy we aya niat hayang kadinya. Ngan.... lakadalah. Sakola kuring pan beda. Euweuh ijazahan siga batur. Muter uteuk. Akhirna, pun bapak tamada ka hiji sakolaan anu Kep Sekna teh rerencangana. Bisa! Kuring bisa ngilu ujian wungkul. Tangtu sanggeus mayar anu lumayan gede:SPP tilu taun jeung ujian-ujiana. Terus jadi boga rapor. Tapi ninggali nileina, matak sieun. Panggedena angka genep. Bayangkeun we! Ujian beres. Tapi nya kitu. Ijazah meunang. Ngan nileina matak hoream ninggali. Da asa teu bodo-bodo teuing, cekeng teh. Tapi bae lah, masih meunang keneh ujian, sok sanajan panitia kerung: ku nilei jiga kitu wani keneh UMPTN? Prung we UMPTN. Enya we, bodo. Teu lulus! Hese ka IPB teh. Taun isukna ngilu deui. Angger we...teu lulus. Padahal geus ngamenyan sagala. Ari bodo mah angger we. Teu bisa didukunan. Haha. Ah, bae, indit ka Jakarta. Nyoba ngilu ujian di IAIN. Teu pati dipikiran (basa kasarna teu dibaca deui) unggal soal teh. Gutrut-gutrut we. Anggeus. Barina oge teu pati minat. Sabab euweuh jurusan pertanian. Milih jurusan Filsafat. Maksud teh, teu kagok. Niat hate ka Bumi, da euwueuh, nya sakalian milih langit. Barang pengumuman...eh...bet lulus. Aneh! Nya, sakola we. Bae. Nga ari hate mah, merod we hayang diajar pertanian. Jadi, di luar sibuk neuleuman elmu kapilsapatan, elmu Pertanian oge dibaca. Nya lumayan, kadang-kadang dikomparasikeun jeung pun bapak. Aya anu cocog, lolobana mah hanteu. Teuing kunaon, pedah belegu wae kitu? *** Ayeuna gawe di Bogor. Lolobana jeung ahli "rada" pertanian. Aya elmu ekonomi pertanian, pemodelan pertanian, makro ekonomi (pertanian), jrrd. Maklum di tempat gawe ampir 90-an persen alumni IPB. Tah didieu kuring manggihan sababaraha kanyaho ngenaan postulatna dunya tatanen. *Kahiji* Keur urang Indonesia, usaha di widang ieu memang leuwih loba ngarugikeun. Hal ieu dumasar tren pertanian di Indonesia, anu cenderung ngagunakeun pola tradisional, sahingga teu kompetitif di pasar. Ahli-ahli di dieu make gambar, anu basa digambar keneh mah kuring ngarti tapi ayeuna mah lebeng; Mun enya oge hayang maju. Kudu aya nilai tambah. Lain dina produksi wungkul, tapi oge di laina. Conto, packaging, rendah residu kimia malah mun bisa mah bebas sama sekali, jrrd. *Kadua* Sababaraha UU ngenaan tatanen. Conto UU budidaya, memang nitikbeuratkeun kana liberalisasi. Sahingga, anu dipiharep sistem tatanen urang tiasa "terintegrasi" jeung pasar, tapi dina kanyataana malah medok. Kunaon? Sabab di sistem tatanen urang, strukturna can siap. Komo deui budayana. Akibatna, di Indonesia fluktuasi harga teu bisa dikendalikeun. Kadang loba barang teh. Kadang ngiles. Tah, statemen Dep Tan, sabenerna ngan perkiraan. Lain dumasar kana informasi anu kuat. Kusabab naon? Sabab patani di Indonesia, boga hak pepelakan sakahayangna. *Katilu* Aya rejim anu hese pisan ditembus. Komo deui ku sektor pertanian. Rejim naon? Rejim harga! Tah, tepi ka poe ieu, rejim ieu teh can bisa dicekel. Komo deui, kadang sababaraha komoditas, nuansa politikna kuat pisan: contona beas!. Tapi masalahna oge, di sektor pemasaran lemah pisan. *Kaopat* Politik pertanian di Indonesia lemah pisan. Pamarentah can ngajadikeun tatanen salah sahiji moda produksi utama keur ningkatkeun darajat urang Indonesia. Nu aya, tatanen di Indonesia diliberalkeun (buktina subsidi pertanian dicabut saperti pamentana WTO jeung IMF). Pamarentah urang teu sadar yen eta teh strategi eta teh supaya produk luar bisa asup bari teu dilarang. Teu paduli mun eta kawijakan teh nyababkeun patani urang ancur. *Kalima (ieu mah kalolobana pamanggih kuring)* Mun usaha widang ieu hayang untung. Salian ti produksi kudu hade, kualitas kudu onjoy, oge sistem tur budaya anu kudu dirobah tina pola-pola biasa. Conto, patani anu beurat benghar nyaeta Bob Sadino jeung "Kem". Bob mucekil dina widang ieu, kusabab nguasai *on farm *tur *off farm* na. Monopoli oge, sabab manehna anu tani, manehna anu ngajual langsung ka konsumen. Beda pisa jeung patani urang. Budaya industri tangtu teu kudu ditarjimkeun pabrikasi. Sok sanajan aya benerna. Tapi cara-cara metakeun masalah tananen ti A – Z. Conto sederhana, naha tatanen irang geus diwangun ku data *demand-suply *anu rada akurat? Inget, barang tatanen mah tereh pisan rusakna. Ieu oge kudu dipikiran. Sahingga, produksi urang ulah tepi ka mubah jadi runtah. Anu balukarna bisa ngarugikeun. Hehe *Kagenep* Mun urang bisa ngokolakeun usaha tani di hulu tepi ka hilir, ceuk pamanggih kuring, tinggal kuatan dina produksi, jeung wangun ideologi konsumen, sahingga ngarasa kaiket. Mun geus kitu, pan jadi komunitas tah. Conto komunitas penggemar buncis. Ti dinya, pan bisa diitung sabarah kabutuhan eta komunitas teh saminggu, sabulan, satauna. Urang tinggal ngaefisienkeun produksi, sangkan target katepi. Mun eta geus permanen, dina harti komunitas geus kuat. Ideologisasi geus kawangun, karek tah pasar dilegaan. Produk didiversifikasi. Conto: buncis rasa mangga! Hehe. *Kadalapan* Engke deui ah. Mun salse. Ayeuna pakepuk pisan. Ieu oge sugan we bener! Baktos Tantan