Assalamu'alaikum.w.w.
Maaf dunsanak kasadonyo. Dek cah sabalun iko kito lah badiskusi
panjang soal "perempuan" dalam Islam, nan sabananyo bana ambo
nio barangah agak sajamang supayo agak rado juo snek. Sabab masalah
induak-induak ko iyo panjang caritonyo ko mah. Kalau indak
dapek basaba bisa salah tangkok, salah pacik, salah ... dan salah
kasudahanyo salah kasadonyo. Sabab persoalan "gender" ko dalam Islam
tamasuak urusan gadang, buktinya ratusan hadits Nabi saw. soal gender
ko. Cuma dek alah dimuloi, alah babega carito ko, amuah indak namuah
ambo tantu sato juo. Cuma ambo minta maaf talabiah dahulu kok ado
nan tasingguang atau nan tagisia dinyo, sabab manyabuik nan sabananyo
ko iyo kadang-kadang agak payah. Dek itu mako urang gaek-gaek kito
mangecek, "Babuek baiak bapado-pado, babuek jaek sakali jangan".
Aratinyo kok kababuek baiak iyo agak dipikia-pikia juo, dan jan pernah
sakali juo babuek jaek. Tapi Mudah-mudahan Allah swt. manurunkan rahmat
dan karunia untuak kito. Aaamiiin.
Bismillah.
Kito muloi dari pangka ota. Lah disabuik dunsanak kito persoalan
urang nan bajilbab tapi parangainyo iyo antah. Sudah tu baa ?.
Kabaranti kito manyuruah urang padusi bajilbab ?. Kaditunggu elok
dulu parangai baru ba jilbab ?. Tantu iko ka manjadi benteng dinyo
untuak indak bajilbab, atau dapek indak labiah malu babuek nan indak-
indak daripado urang nan bajilbab.
Dunsanak ambo kasadonyo. Katiko ambo di kampuang dulu, atau sabuiklah
di Indonesia, nan jadi polemik dek urang adolah urusan bajilbab atau
indak. Taraso lucu kiniko dek urusan bantuak itu nan jadi masalah pada-
hal ketentuannyo lah jaleh. Dan katiko ambo tibo di siko kini, indak
itu nan jadi polemik lai doh. Dari carito kawan-kawan nan barasa dari
tanah Arab ataupun lain nagari Muslim, nan jadi polemik bukan soal
wajib atau indak bajilbab, tapi caro mamakai. Di satu sisi ado nan
manyabuik, muko jo tapak tangan indak baa nampak doh dan mereka manga-
mukokan dalil-dalil nan dipakai. Di sisi lain ado nan mangecekkan
harus tutuik muko tu jo cadar, dan hanyo buliah nampak sabalah mato sajo.
Jadi iyo taraso lucu dan agak malu juo ambo dek karano di nagari kito
nan jadi masalah urusan wajib atau indak.
Kiniko kito kaji segi hukumnyo sajo sabab polemik bantuak itu alah
jadi urusan furu'(cabang). Indak paralu baa caro mamakai doh,
untuak tahap kiniko, kalau lai bapakai lah jadi tu.
Ambo sampaikan ka dunsanak kasadonyo, jilbab hukumnyo wajib bagi
satiok muslimah. Dasar hukum ko disabuik dek ulama-ulama salaf dan
ulama-ulama nan berkompeten dalam Islam. Dalil nan ambo tulih hanyo Al Qur'an
sajo dek karano hadits tantang iko cukuik banyak. Cuma, sabalun kito
manyuruah urang padusi kito batutuik, dalam Al Qur'an, sabalun tibo di ayat
tantang itu, urang laki-laki diwajibkan untuak indak sumbarang maliek.
Cubo simak.
Allah swt. berfirman.
"Katakanlah kepada orang laki-laki yang beriman : "Hendaklah mereka
menahan pandangannya dan memelihara "faraj" nya, yang demikian itu
adalah lebih suci bagi mereka, sesungguhnya Allah lebih mengetahui
apa yang mereka perbuat." (QS: An Nuur (31):30).
Jadi sabalun itu, kaum apak-apak iyo indak buliah sumbarang manci-
liang kecek bak bahaso Uda Syamsir. Sia sajo, bia anak gadih urang,
bini urang, kamanakan urang, dlsb. indak buliah diciliang.
Ee.. pak, kok tacaliak baa ?. He he he he, sagalo nan ta nan berarti
indak sangajo, indak badoso doh. Contohnyo tatidua sampai matoari tabik,
mako disabuik dalam hadist, urang tu buliah sumbayang subuah katiko inyo
jago. Kecuali balalok-lalok an. he he he he.
Sudah tu baru tibo di ayat untuak padusi. Partamo di surek An Nuur
ayat 31, lanjutan nan tadi.
"Katakanlah kepada wanita yang beriman... (nan baiman ko haa...),
"Hendaklah mereka menahan pandangannya, dan memelihara "faraj"nya,
dan janganlah mereka menampakkan perhiasan mereka kecuali yang
biasa tampak daripadanya, kecuali kepada suami-suami mereka,
atau ayah mereka, atau ayah suami mereka, atau putra-putra mereka,
atau putera-putera suami mereka, atau saudara laki-laki mereka,
atau putera-putera saudara laki-laki mereka, atau putera-putera
saudara perempuan mereka, atau wanita-wanita Islam, atau budak-
budak yang mereka miliki, atau pelayan laki-laki yang tidak
mempunyai keinginan terhadap wanita, atau anak-anak yang belum
mengerti tentang aurat wanita. Dan janganlah mereka memukulkan
kakinya agar diketahui perhiasan yang mereka sembunyikan. Dan
bertaubatlah kamu sekalian kepada Allah hai orang-orang yang
beriman supaya kamu beruntung." (QS:24:31).
Jadi salain dari nan tasabuik, kasia sajo harus bapakai jilbab, tama-
suak nan acok kito lupo, yaitu jo adiak ipa atau kakak ipa, bilo batamu
karumah, alun buliah disuruah masuak (walaupun ado suami) sabalun mamakai
jibab.
Ciek lai, dalam surek al Ahzab(33) ayat 59.
"Hai Nabi katakanlah kepada isteri-isterimu, anak-anak perempuanmu
dan isteri-isteri orang mu'min : "Hendaklah mereka mengulurkan
jilbab ke seluruh tubuhnya". Yang demikian itu supaya mereka lebih
mudah untuk dikenal, karena itu mereka tidak diganggu. Dan Allah
Maha Pengampun lagi Maha Penyayang."
Dari duo ayat ko tajadi polemik antaro manutuik muko jo indak.
Cuma di awak, nan jadi masalah tantang wajib dan indak. Aneh.
Kalau sempat pulo dunsanak batanyo baa mangko co itu kajadiannyo.
Manuruik ambo dek karano sejarah perjalanan da'wah sampai ka Indonesia.
Dan dari sejarah "walisongo" dapek kito maambiak gambaran bahaso mereka
untuak dapek maajak urang ka dalam Islam, mamakai caro kompromi-kom-
promi. Dan skala prioritasnyo, suruhan mamakai jilbab ko labiah kudian
dari suruhan Sumbayang zakat jo puaso. Tapi kini sasudah Merdeka, nan
keadaan iko indak juo barubah dan toleransi nan alah diagiahkan nampak
nyo dipasokan urang untuak tatap takah itu. Dan memang alah saatnyo pulo
kito manyampaikan baa nan sabananyo. Mudah-mudahan Allah swt.
mengampuni doso kito kasadonyo. Aaamiiin.
Sampai disiko dulu dek lah tapanjang bana.
Wabillahi taufiq wal hidayah
Wassalam
Khairi Yusuf
LAPAU RantauNet di http://lapau.rantaunet.web.id
Isi Database ke anggotaan RantauNet:
http://www.egroups.com/database/rantaunet?method=addRecord&tbl=1
=================================================
WEB-EMAIL GRATIS ... @rantaunet.web.id ---> http://mail.rantaunet.web.id
=================================================
Subscribe - Mendaftar RantauNet Mailing List, kirimkan email
Ke / To: [EMAIL PROTECTED]
Isi email / Messages: subscribe rantau-net email_anda
Unsubscribe - Berhenti menerima RantauNet Mailing List, kirimkan email
Ke / To: [EMAIL PROTECTED]
Isi emai / Messages: unsubscribe rantau-net email_anda
=================================================
WebPage RantauNet http://www.rantaunet.web.id dan Mailing List RantauNet
adalah servis dari EEBNET http://eebnet.com, Airland Groups, USA
=================================================
