Mak Sutan Lembang Alam rang Balai Gurah di Ampek IV Canduang nan ambo hormati,
Langgam bahaso urang IV Angkek Canduang nan ko nan satahu ambo memang dipakai di wilayah Agam Tuo sajo. Mulai dari Padang Tarok di sisi Timur hinggo ka Matua Tigo Balai/Salingka Danau Maninjau di sisi Barat, untuak nagari-nagari di Palupuah jo Palambayan agak babedo bahasono. Walaupun baitu, ditiok nagari ado kato-kato nan spesifik pulo nan hanyo dipakai di masing-masing nagari untuak manyabuik suatu istilah. Paralu juo diketahui, irama tutua bahaso urang Batipuah X Koto mirip pulo jo Agam Tuo. Batipua X Koto wilayah administrasinyo masuak Kab. Tanah Datar, dengan nagari-nagari nan barado di kecamatan X Koto saroman Pandai Sikek, Aia Angek, Panyalaian, Singgalang & kecamatan Batipuah saroman nagari Batipuah Ateh, Batipuah Baruah, Jao, Tambangan, Andaleh, Pitalah. Bedanyo nan ambo caliak pado penggunaan 'no' nan manjadi 'nyo'. Sadangkan nagari-nagai di sekitar Batusangka langgam bahasonyo labiah mirip jo wilayah Mudiak 50 Koto, nan mamakai kato 'godang', 'kodok', 'copek', dan lain sabagainyo. Kan indak pulo harus takah bahaso di kampuang mak Sutan Lembang Alam pulo kito mambuek tulisan di milis nan ko. Bahaso minang nan umum kito pakai sebagai bahaso pergaulan adolah dialek Pandang Panjang (Batipuah X Koto), mungkin dek karano sajak maso daulu urang minang dimano sajo di nagari-nagari banyak basikolah ka Sumatera Thawalib & Dinayah Putri maso sisuak. Kok ambo pakai pulo dialek Mudiak di palanta nan ko, iyo agak poniang pulo baiko nan mambaconyo, sabab alah jadi suatu dilema dimilis nan ko, salah takok manjadi debat kusia nan mambuang tanago jo wakatu. Atau mak Sutan Lembang Alam kok namuah pulo ambo ajak babahaso ughang Piaman ko eh? Bak cando curito urang di Sumpu, kutiko urang gaek buya Syafii Maarif babini ka Lintau, baliau cando urang tuo sisuak kalam makan diuncangkan nasi ka muluik. Batanyolah urang Lintau ko baliau, "Banyak Onggang di Sumpu uwo? Jawek baliau, "Indak sabanyak anjiang di siko". Kok kughang paham mukosuik cughito mantun, rancak mak Sutan Lembang Alam bajalan pulo bilo-bilo ka nagohi Sumpuhg ko, soban banyak bajalan banyak pulo nan coliak. Kan iyo baitu nyeh? wasalam AZ/lk/34th/caniago Sumpur Kudus Makkah Darek, aienyo janiah ikannyo jinak, Kasiaknyo putiah tabiangnyo landai, bajak tingga di sawah basahan tingga di tapian indak ilang, Rando bajalan surang bak anjiang lapeh bakungkuang, Dago dagi pambari malu, sumbang salah laku parangai, Kalau bajalan hak pangulu, bapantang kusuik indak ka salasai, Dago dagi pambari malu, sumbang salah laku parangai, Mulo badiri nagari Sumpu, dek basidang di Batu Balai asa nogori Kubang, Luhak 50 Koto babakono ka Canduang Koto Laweh, Luhak Agam ________________________________ Dari: Muhammad Dafiq Saib <stlembang_a...@yahoo.com> Kepada: "rantaunet@googlegroups.com" <rantaunet@googlegroups.com> Dikirim: Rabu, 11 Juli 2012 19:51 Judul: MANTUN Re: Bls: [R@ntau-Net] Re: BANGGALAH DENGAN LAFAS MINANG KITA...!!!!===>Re: [Buya H. Masoed Abidin] Dari Abu Hurairah rodhiallohu ‘anhu berkata, Assalaamu'alaikum wa rahmatullaahi wa barakaatuhu Dunsanak Armen sarato dunsanak sa palanta.... Ado tanyo ketek di hati ambo satiok mambaco kato-kato 'mantun' dalam postingan sanak Armen. Di kampuang ambo, di Ampek Angkek - Agam ( dakek Bukiktinggi), kato-kato 'mantun' ko bararati 'baitu' atau 'begitu' dalam bahaso Indonesia. 'Kok mantun baa no?' (kok baitu baa no = Kalau begitu bagaimana kira-kira). 'Anto, ka mantun bana angku kini?' (Kok ka baitu bana angku kini?'). Dalam kalimaik ; 'Pak MM*** mantun kan urang Agam, bak nan harus kito pahami,' di kampuang kami dipakai kato 'nantun'. 'Nantun' aratino 'nan itu'. Sadangkan 'nanko' bararati 'nan iko'. Di kampuang ambo, urang ka mangecek-an; 'Pak MM*** nantun kan urang Agam........' Nan jadi tanyo, apo memang ado nagari-nagari nan manyabuik-an 'mantun' ko saarati jo 'nantun' di kami di Ampek Angkek? Wassalamu'alaikum, Muhammad Dafiq Saib Sutan Lembang Alam Suku : Koto, Nagari asal : Koto Tuo - Balai Gurah, Bukit Tinggi Lahir : Zulqaidah 1370H, Jatibening - Bekasi -- -- . * Posting yg berasal dari Palanta RantauNet, dipublikasikan di tempat lain wajib mencantumkan sumber: ~dari Palanta R@ntauNet http://groups.google.com/group/RantauNet/~ * Isi email, menjadi tanggung jawab pengirim email. =========================================================== UNTUK DIPERHATIKAN, melanggar akan dimoderasi: - DILARANG: 1. E-mail besar dari 200KB; 2. E-mail attachment, tawarkan di sini & kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://forum.rantaunet.org/showthread.php?tid=1 - Tulis Nama, Umur & Lokasi disetiap posting - Hapus footer & seluruh bagian tdk perlu dlm melakukan reply - Untuk topik/subjek baru buat email baru, tdk mereply email lama & mengganti subjeknya. =========================================================== Berhenti, bergabung kembali, mengubah konfigurasi/setting keanggotaan di: http://groups.google.com/group/RantauNet/