Assalaamu'alaikum wa rahmatullaahi wa barakaatuhu Rahima di Kahirah,
Ka ambo jawab urusan harato pusako tinggi sajo, jo kamampuan dan pamahaman ambo. Harato pusako tinggi itu indak bapunyo sarupo jo hutan rimbo nan indak bapunyo dalam arti kato indak ado nan punyo hak utuh untuak mamilikino. Sabab awakno sacaro turun tamurun memang iyo pulo alah diturunkan pangurusanno malalui jalur ibu. Ambo pintehi sajolah. Kecek-an kini ambo indak katuju lai jo caro sarupo itu, mako kaambo rubah, ka dijadian aratotu sarupo arato nan diatur sacaro syarak, nan kadiwarihan kaanak-anak baiak laki-laki ataupun padusi jo bagianno masiang-masiang. Disiko timbua masalah. Dimaa titik awal mambagi tu kadimuloi? Arato nenek tuo ambo nan baranak padusi surang dan baranak laki-laki baduo. Nan anak-anak baliau itupun alah indak ado lai. Baa jano ambo mambagi? Dimaa dalilno ka ambo bagi saolah-olah itu hak milik panuah ibu ambo? Bisa mandakwa pulo anak-anak mamak-mamak ambo, kalau iyo kadibagi kini manuruik caro faraidh. Salasai sampai anak-anak mamak ambo misalno, alun juo salasai etongan lai. Enek ambo badunsanak padusi pulo surang lai, nan ado pulo anak-anak nenek mudo ambo ko. Nan ambo imbau mak tuo atau etek. Nan ambo imbau mamak (laki-laki) pulo. Katurunan-katurunan baliaukopun bisa pulo mandakwa kalau iyo ka dibagi sacaro faraidh kini. Sarupo itulah rumikno masalah harato pusako tinggi tu. Itulah sababno urang sakaliber Buya Hamka indak punyo solusi manyalasaianno. Biaan sajolah diposisi sarupo itu kini. Hak pakai bagi kalangan urang padusi, sabagai kajadi benteng partahanan bagi urang-urang padusi. Ambopun satuju iko bukan manyalasaikan masalah sacaro syarak, sabab syarak iyo mangatur bahaso warih adolah kapado anak-anak laki-laki jo padusi. Tapi nan arato pusako tinggi tu iyo indak tau ambo jalan kaluano doh. Mako untuak diri ambo, ambo maminimalisir bana maambiak manfaatno. Pangurusan sawah ladang sarato rumah urang gaek (ibu) ambo di kampuang iyo indak ambo gutiak-gutiak do, bialah nak jadi hak pakai adiak ambo padusi pulo, nan mamfaaikanno sakadarno pulo lai. Kami abih ka rantau ka sado alahanno. Hasia sawah di kampuang diambiak antaro lain ka pambayia listrik rumah di kampuang. Kapamelok-meloki rumah kalau ado nan rusak. Umumno kami makan bareh babali di rantau. Nan kaduo, sarupo nan ambo tulih sabalunko, kalau tajadi juo jua bali, tajua harato pusako tinggi dek kumpulan urang sacaro kolektif dalam sabuah pasukuan, misalno untuak pameloki rumah gadang nan runtuah, atau untuak mamparalekan anak padusi, atau kaparaluan lain nan sifaikno untuak karajo basamo, mako kaum sapasukuan mustino manjua iyo bana jo caro nan luruih-luruih pulo. dan tasabab di keterpaksaan itu bana pulo. Bukan karano sumbarang nak manjua sajo sudah itu pitihno dibagi-bagi, manuruik pandapek ambo iko indak buliah dikarajoan. Tapi sabaliakno, bagi nan mambali mako manjadi jalehlah kapamilikan sawah atau ladang nan dijua tu, sainggo indak buliah diuruih sarupo mauruih arato pusako tinggi juo. Baitu pandapek ambo. Tantangan pagang gadai, kalau urang mamacik atau mamagang sabidang sawah, manuruik kayakinan ambo tatap buliah urang tu maambiak manfaat dari sawah tu sabagai barang agunan. Baitu juo saandaino nan tagadai tu rumah, atau oto, atau barang-barang lain, nan kalau indak dimanfaatkan malah mungkin akan manjadi rusak dan mubazir. Namun katiko urang nan punyo manabuih no suatu hari nanti, awakno musti mamulangkan barang gadai tu dalam kaadaan elok sarupo dulu ditarimono. Salamo barang tu di pacikno dek tagadai kaano, tatap buliah awakno maabiak manfaaik. Panah ambo rasono mandanga, dijaman Nabi ado nan manggadaian unto, lalu unto tu dimanfaatkan dek nan mamagang. Dipakai untuak kandaraan, diambiak ayia susuno. Tolong Rahima pareso apo memang iyo ado riwayaik sarupo itu. Nan lain-lain ambo raso alah cukuik jaleh dari tulisan-tulisan ambo sabalunko. Wassalamu'alaikum Lembang Alam ----- Original Message ---- From: Rahima <[EMAIL PROTECTED]> To: RantauNet@googlegroups.com Sent: Sunday, February 24, 2008 5:04:56 PM Subject: [EMAIL PROTECTED] Re: DIM 25: PETA HARATO PUSAKO TINGGI. --- Muhammad Dafiq Saib <[EMAIL PROTECTED]> wrote: > > Assalaamu'alaikum wa rahmatullaahi wa barkaatuhu > > Ado nan agak bamasalah sabanano dalam masalah harato > pusako tinggi ko nan sacaro sadar atau indak sadar > sadang tajadi di tangah masyarakaik Minangkabau > sajauah nan nampak di ambo. > > Kalau manuruik pandapek ambo, nan harato pusako > tinggitu, sarupo nan alah baulang-ulang ambo > tulihan, indak bisa dibagi sacaro syarak, sabab > indak jaleh kapamilikanno. Nenek tuo di rumah gadang > bukan lah pemilik, malainkan hanyolah pengguna, > pengambil mamnfaat. Baliau maabiak hasia sawah > ladang untuk sakadar ka dimakan. Baliau indak buliah > manjua harato pusako tinggi tu kacuali ado tigo hal > alias sabana alah tasasak bana yoitu, rumah gadang > katirisan, gadih gadang indak balaki, mayik tabujua > ateh rumah. Barulah basuo, indak kayu janjang > dikapiang, indak ameh bungka diasah. Baru buliah > tajadi jua bali arato adaik, jo kasapakatan kaum > kaluarga, nan pitihno paralu untuak maatehi masalah > nan tigo itu. > > Jadi bisa juo tajadi akhirno jua bali. > > Mako, kalau alah tajadi jua bali, bagi nan mambali, > aratotu serta merta barubah kadudukanno manjadi > pusako randah. Indak amuah dimasuakan ka pusako > tinggi lai, sabab bagi nan mambali, kapamilikanno > aleh jaleh, indak ado lai kasulitan untuak mambagi > sacaro syarak. Wa'alaikumsalamwarahmatullahiwabarakaatuh. Mak lembang Alam dan dunsanak kasadoalahe, semoga Allah merahmati kita semua. Maaf mak, ambo kalau manulih, agak lambek babahaso Minang, meskipun kalau basuo jo urang Minangkabau di Bukittinggi, atau di Kairo ini, acok babahaso Minang juo. Lai, indak talampau sulik bana bagi ambo babahaso Minang tu, kalau hanya sekesar inter aksi biaso, tapi kalaulah bapantun-pantun jo bahaso Minang, iyo, kalimpungan ambo dibueknyo. Baa banapun ambo harus menghargai asa amak ambo urang Minang, meski ado nan menfitnah ambo di RN ko, bahwa ambo indak urang Minang doh, dan berbagai macam fitnahan lainnyo. Allah sajolah nan ka bambalasi fitnahannyo tuh, ambo serahkan ka Allah Subhanahu wata'ala, karana Allah Maha Tahu. Bagi ambo sacaro pribadi, talampau kurang aja mangatoan ambo bukan urang Minang, dari mana nyo bapandapek saroman tu. Lamak surang se nyo mailangkan asa amak ambo, dan fitnahan lainnyo, harato amak ambo, alhamdulillah sampai kini masih ado. Nan tagadaipun masih alhamdulillah, indak sombong ambo doh, sangaiklah banyaknyo. Indak lo maha bana, masih bisa tajangkau diambo maambiak baliak nan tagadai tu. Alun lai pusako tinggi amak ambo nan babagi balimo, bisa kayo ambo, kalau ikuik maambiak gilirantu. Jan kan harato amak, harato apak nan di kalimantan, nan alah dibagi-bagi untuak anak-anak apak kasodonyo, dari 9 urang anaknyo mandapaik 1 hektar surang, indak loh ambo ambiak doh, iko nan alah jaleh bana halal harato ambo. Alhamdulillah, indak miskin bana ambo doh, meskipun di kampuang ambo bacarito naiak angkot, bis, itu bukan karena miskin, indak barharta lai dikampuang, tapi sabana-bana ambo takuik mambawo oto, alah bapasanan katiko tu oto nan pas untuak padusi, tapi indak jadi doh,(sempat hilang pitih dek indak jadi katiko tu) takuik se mambawo oto surang, samantaro untuak maambiak sopir oto, tantu bapikia ulang diambo, kalau acok jo supir oto baduaan, sacaro agamo apolah hukumno. ____________________________________________________________________________________ Never miss a thing. Make Yahoo your home page. http://www.yahoo.com/r/hs --~--~---------~--~----~------------~-------~--~----~ =============================================================== UNTUK DIPERHATIKAN: - Wajib mematuhi Peraturan Palanta RantauNet, mohon dibaca & dipahami! Lihat di http://groups.google.com/group/RantauNet/web/peraturan-rantaunet. - Tuliskan Nama, Umur & Lokasi anda pada setiap posting. - Hapus footer & bagian yg tidak perlu, jika melakukan reply. - Email attachment, DILARANG! Tawarkan kepada yg berminat & kirim melalui jalur pribadi. - Posting email besar dari >200KB akan dibanned, sampai yg bersangkutan minta maaf & menyampaikan komitmen mengikuti peraturan yang berlaku. =============================================================== Berhenti, kirim email kosong ke: [EMAIL PROTECTED] Daftarkan email anda pada Google Account di: https://www.google.com/accounts/NewAccount?hl=id Agar dapat melakukan konfigurasi keanggotaan di: http://groups.google.com/group/RantauNet/subscribe =============================================================== -~----------~----~----~----~------~----~------~--~---