Ceuk Si Lengser: Terus, batur! Terus! Itung-itung ngaragaji jagat! Terus! Abeh kurap dina taktak, Abeh hapur dina bujur, kabeh beak ka akar-akarna!
Ceuk balad urang di Patuha: "Rambati....rata haaayu.....!" Laju Durudud Si Lengser digusur ka luhur! Ceuk Embah Anom jeung Embah Anis: "Upih jambe murag ngabete! Bereleeeeee..............!" Dereded Si Lengser ku Embah Anom jeung Embah Anis disarered deui, ditatarik deui ka sisi cai! Barang anggeus ku batur-batur didurudud ka luhur deui Ku musuh deuk disered ka lebak deui. Ceuk Si Lengser ka urang Patuha: "Esotkeun batur! Leupaskeun!" Atuh barang dereded teh, Embah Anom jeung Embah Anis, nararik teh, badis mesat jeujeur pegat useupna! Mani tinggulitik jujuralitan, ting gorolong ka lebakkeun....! Paheula-heula jeung si Lengser...! Lantaran Si Lengser mah awak inyana lintuh cara kebo buleud keur reuneuh, atuh si Lengser mah, ngagorolong teh, cara berenuk murag di lamping! Karuhan Inyana datang pangheulana ka sisi cai! Ceuk Si Lengser kanu ragrag pandeuri: "Warani?" Ceuk Embah Anis jeung Embah Anom: "Ke heula! Ulah waka ditanya! Lalieur keneh; jeung can eling bener!" (Puguh ceuk ti heula oge, perang baheula mah, hanteu cara perang di jaman kiwari) Si Lengser teu tatanya deui! Embah Anis jeung Embah Anom laju dirawu; Dialungkeun! Ari Embah Anis? Inyana ragrag di bilangan kiwari Tanah Serepong! Ari Embah Anom? Ragrag di bilangan kiwari tanah kahuripan sakalereun Gunung Bubut ....! Bejana mah, engke teh jaradi karamat! Ngan digaranti ngaran lantaran areraeun eleh perang Jeung kulantaran ngaran Anis jeung Anom mah, cara ngaran Jaya jeung Tubagus, eta mah ngaran arinyana di keur budak! Apan ari geus jardi pangkat mah, ngaran arinyana sarejen deui ...... Ari gawir urut si Lengser disered jeung digusur, kiwari teh aya keneh! Lebah dinya disarebutna: DEREDED ....! Di lebah urut Si Lengser lengak-lengok tempa-tempo, engkena ngadeg lembur anu kiwari ngaranna : LOLONGOK! Barang si Lengser keur telag-telog cara Bango ngadodoho bangkong, inyana kadeuleu musuh! Laju diaruber, dikarepung diarudag-udag! Si Lengser nyumput Inyana teuleum dina rawa nu loba bolangan! Engkena di urut Si Lengser nyumput, ngadeg lembur nu dingaranan RAWA BOLANG! Ti enggon inyana nyumput Kadeuleu ku Si Lengser, musuh ngaleut keur naranjak, NGABONDONG ka tonggoheun; Laju ngarumpul di lebahan anu rata! Engkena Di lebah dinya ngadeg lembur Nu kiwari disarebutna: BONDONGAN! Sabab di lebah dinya pisan, ngarumpulna musuh nu eundeuk ngarurug bari naranggoan parentah mudu taram! (Mudu taram= kudu mimitian rosa). Anggeus mahi loba batur-batur arinyana, musuh laju ngarurug .......... [Lajengkeuneun]