Cindekna, perang cara si Lengser mah, datang ka iraha oge, moal eundeuk aya nu bisa niru! Teu kabilang anu modar, Teu kabilang anu rarusak ....! Nu teu katubuk teu kadupak, teu katejeh teu kasiku, Ripuhna sarua baaaaae ...! Malahan arinyana mah paraeh leuwih cilaka! Nyaeta: Molotot sabari sambutut, bari leungeun marencet irung! Sabab Si Lengser, perang teh, inyana mah mamawa sigung ....!
Tunda heula! Keun Si Lengser sina nurutan sigung! Urang mah urang tempo Raja urang! Nu keur perang dibantu ku Ki Santang! Perang arinyana rosa jasa! datang ka tegalan sakitu legana, jadi heurin ku nu keur perang ...! Ting dorongdok tampal nu reuntas, ting bareok dapuran awi ....! Tegal lega, ngalegaan ....! Beuki lega, beuki .....lega! (Engkena di tegalan tadi perang, ngadeg lembur anu kiwari disebut: Tegal-lega......!) Ceuk tadi oge Pajajaran kawalahan! Sabab najan gagah najan sakti, ari musuh Tambah deui, tambah deui mah lila-lila nya kawalahan jasa! Raja urang kasedekeun ka beh kidul, Ki Santang kasedekeun ka beh kidul! Ari Si Lengser? Inyana mah terus bae saradag-surudug susurudug .... Barang nyurudug deui teh, kalangsu teuin.....! Engeuh-engeuh inyana tikucubar di Ci Sadani (Cisadane? WLY) Pucunghul inyana timbul .... alagag-euleugeug bari kabesekan...! Laju gurawil keuna gawir, jiga peusing unggah ka pasir! Hanteu kanyahoan .....kadewek! Cokor si Lengser sadua-dua Ti lebak aya nu newak! Heu! Si Lengser aya nu ngabeubeutkeun! Manu nambru jiga mandalika dalu! Ceuk nu ngabeubeutkeun, sabari nyararengir: "Heheh! Kapilahaan nyah...?" Ceuk Si Lengser: "Heueueu....euh!" Laju inyana eundeuk ngalawan; ngalawan bari murangteng; Bari muranteng keuna cangkuang! Tapi di Lebak, cokor si Lengser duanana dibaredol sataker tanaga! laju si Lengser tetejeh.....! satejeh dua tejeh.... katilu tejeh mah, gubrag bae Si Lengser ngajolopong! Laju disesered digarusur ka lebak deui ....! Reg! randeg .... Sabab si Lengser muntang kana cangkuang deui! (Cangkuang geh, cangkuang baheula, lain cangkuang jaman kiwari). Laju pabedol-bedol .... Musuh ngabaredol si Lengser, Si Lengser ngabedol cangkengna....! Bedol! Bedol..... Bedol .....pabedol-bedol! Ari nu ripuhna mah, nya si Lengser beee.....! Piker inyana: "Saha manusaaaaaaa nu ngabedol?" Ari ret teh Kadeuleu ku inyana dua urang ting carengir! Ceuk si Lengser: "Baruk Si bedul! Geuningan si Ganggarangan! Si Anom jeung si Anis...!" Ceuk Embah Anom jeung Embah Anis: "Heheh! Beunang siah ayeuna mah!" Si Lengser motah deui! Inyana motah jasa, tetejeh sabari murangteng, bari muranteng sabari nyerengid!(?) Ceuk Embah Anom: "Bedol Nis! Urang SUNDATAN!" Ceuk Embah Anis: "Bedol Nom! Urang Sundatan!" Ceuk Si Lengser: "Moal teurak! Geus liat teuin!" Laju pabedol-bedol deui......! Bedas nu ngabaredol, pageuh nu dibedol ..... Tapi lajuna mah, Cangkuang laju rungkad pegat akarna ....! Harita di Patuha, di tonggoheun Balekambang, ku balad urang nu keur jaga kadeuleu si Lengser keur rorowesan! Laju ditarulungan! Durudud! Si Lengser digarusur ditarulungan! Dereded! Si Lengser disarered, disered musuh ka lebak deui, disarered ka sisi cai ....! Durudud! Si Lengser ku batur-batur Digarusur ka tonggoh deui dibawa unggah ka lebah Patuha. Tapi Dereded! Si Lengser ku musuh-musuh disarered ka lebak deui....! Durudud deui, dereded deui, ka tonggoh deui, ka lebak deui, datang ka gawir di lebah dinya beuki legok, beuki lega....! [Lajengkeuneun]
