Server mailing list RantauNet berjalan atas sumbangan para anggota, simpatisan dan
semua pihak yang bersedia membantu. Ingin menyumbang silahkan klik:
http://www.rantaunet.com/sumbangan.php
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
Ass,wr,wb.
Dunsanak nan talingkuik dek Rumah Gadang Rantaunet ko, ketek indak ka
basabuik namo, gadang indak ka baimbau gala, salam tatuju ka diri kito
masiang2.
Mumpung dalam suasano puaso, lamaknyo kito maota nan ringan2 sajo, apo nan
ringan2 tu ?, iyo lah, baa mangko akhir2 ko nuansa ke-Minangan di palanta
kito ko agak pudar ambo caliak, maa nyo Mamak2 dan Uda2 nan biaso ber
pepatah-petitih di palanta kito ko.
Hampia tiok ari, ambo caliak, postingan sering menjurus menjadi polemik,
saliang maadu sandiang, saliang maliekkan kehebatannyo dalam baciloteh.
Ambo bukan indak satuju hal nan saroman itu, kalau topik diskusinyo akan
menambah cakrawala ilimu kito khususnyo nan menyangkuik ke-Agamoan, adat
istiadat dan hal2 nan bermanfaat lainnyo, tak jarang ambo simpan di
komputer ambo, seperti: tentang Manasik Haji dll.
Jadi marilah kito kumbali ke jati diri palanta kito ko :
Adaik badunsanak, dunsanak dipaliharo
Adaik bakampuang, kampuang samo dipaliharo
Adaik basuku, suku samo dipaliharo
Adaik banagari, nagari samo dipaliharo
Adaik banegara, negara samo dipaliharo
Adaik babangso, bangso samo dipaliharo
Adaik bamayasarakaik, manusia samo dipaliharo
Sanda basanda bak aue jo tabiang
Nan tuo dimuliekan
Nan ketek disayangi
Samo gadang lawan bakawan
Duduak samo randah
Tagak samo tinggi
Dikaba baiak baimbauan
Dikaba buruak bahambauan
Jauah cinto mancinto
Dakek jalang manjalang
Tapantiang mamiliah
Taserak mangampuangkan
Manukuak mano nan kurang
Mauleh mano nan senteang
Manyambuang mano nan singkek
Manjinakkan mano nan lia
Mamparapek mano nan jarang
Manyisiak mano nan tirih
Malantai mano nan lapuak
Mampabaharui mano nan usang
Mancari kato mupakaik
Manyuruah babuek baiak
Malarang babuek jahek
Mahirik mambantangi
Manunjuak maajari
Manague manyapo
Tadorong maelo
Talompek menyentak
Gawa maasak
Maasak ka nan bana
Hanyuik ado nan ka maminteh
Hilang ado nan ka mancari
Tarapuang ado nan mangaik
Tabanam ado nan ka manyalami
Itulah kato hati ambo nan ambo cuplik dari Buku "Kato Pusako" Bab ke 28
halaman 118 & 119.
Buku ko paragiahan dunsanak ambo nan ambo hormati "Sutan Bandaro Labiah"
Tarimo kasih Tuan.
Semoga ini menjadi renungan kita dikala ngabuburit atau marintang-rintang
ari manunggu beduk dan azan mugarik, jaan lah dijadikan polemik pulo.
Salamaik bapuaso ari nan kaduo, semoga puaso kito ganok sabulan panuah dan
pahalonyo indak rusak dek keberadaan kito di palanta ko.
Salam peduli,
Wassalam,
Mulyadi Sutan Bangsawan (46 +)
Rang Suliek Ayie di Bumi Sriwijaya
~~~~~~~~~~~~~~~~~~~~~~~~~~~~~~~~~~~~~~~~~~~~~~~
Ingin memasarkan produk anda di web RantauNet http://www.rantaunet.com
Hubungi [EMAIL PROTECTED] atau [EMAIL PROTECTED]
~~~~~~~~~~~~~~~~~~~~~~~~~~~~~~~~~~~~~~~~~~~~~~~
Isikan data keanggotaan anda di http://www.rantaunet.com/daftar.php
----------------------------------------------------
Berhenti menerima RantauNet Mailing List, silahkan ke:
http://www.rantaunet.com/unsubscribe.php
========================================
