Mak Ngah, Mak Danil, Bundo Desi dan Sanak Palanta Sore pas pesawat mandarek, di puta stiur lansuang menyisiri tapi ombak nan badabuah Teluk Palu. Di kiri kanan alah banyak tabiang-tabiang colak-colak dek penambangan. Tujuan ka sebuah pusara kawan ambo nan maningga beberapa bulan lalu di Bogor, dimano baliau dikubuakan dipelukan kampuang halamannyo di kampuang Limboro dalam ranah Donggala nan melegenda itu (Kana seri Si Buta Dari Gua Hantu nan bajudul "Badai Teluk Donggala"...kalau indak salah). Kawan ambo ko pasti mamak Danil kenal.....
Kapatang sasudah dilapeh do'a waktu ziarah itu, lai sempat pulo raun sabanta, taragak makan Kaledo baliak di tapi Teluk Palu. Ondeh.....yo ba piuah suok mancaliak soup eksotik ko. Harumnyo Kaki Lembu Donggala (Kaledo) sabana maimbau-imbau, batingkah jo ubi abuih. Disiramkan lado Sulawesi nan padehnyo indak menipu tu, langkok jo piuhan asam nan mambunuah bibit Koleterolnyo. Sasudah tu di taburi pulo jo bawang goreng khas Palu tu. Iyo indak nampak mintuo lalu deknyo. Ide Mak ngah untuak mambuek diskusi diaspora Minangkabau di Sulawesi iko adolah ide nan sangaik menarik, sabab sajajaran pulau gadang iko, mulai dari Makasar, Palu, Gorontalo, Lapeh ka Mindanao, disinan jajak ditanamkan dek urang Minangkabau. Sajak dari generasi penyebaran agamo, sampai ka generasi perantau mancari iduik sangkek kini. Konon kabanyo, Universitas Tadulako ko, sato pulo urang awak sakaki managakkannyo, mangubah status kelas jauh Universitas Hasanuddin Makasar manjadi universitas mandiri. Ondeh Desi, banyak ukatu ambo abihkan bagaua jo urang Kaili dan suku-suku pegunungan dataran tinggi jantuang Sulawesi, sebuah perjalanan adventure nan sulik dilupakan. Kalau di pasisienyo, urang Bugih jo Mandar nan memainkan peran. Mak Danil, barisuak di urak selo, diayun langkah manurun ka Makasar, taragak pulo basilaturrahmi jo sanak-sanak di Makasar, langkok jo wisata kulinernyo, mulai dari coto ka konro, lapeh pulo ka soup saudara, indak lupo pulo mie titi nan bagalintin kuahnyo. Babarapo hari disinan, rantau Palopo nan ka dihadang, disinan Kahar Muzakkar mengakhiri karir. Kok palopo ka disabuik, disinan karajaan Luwu tagak badiri, lamo bahabih maso, hinggo bajajak langkah di selat Malaka jo tanah semenanjung, disinan Si Sawerigading turun ka bumi, hinggo Illaga Ligo di tulih urang. Tapi nan takana ciek lai, iyo Kapurung mak, makanan khas nagari ko, sagu bakuah gurih nan manggoyang lidah. Indak pulo lupo, poco...poco ko Sushi ala palopo, ikan matah nan dimakan jo padiahnyo lado sulawesi dan basiram jo limau kapeh....ondeh...antahlah ka disabuik. Kalau lai talakik sore ko ambo kajaan pai ka pusaronyo Datuak Karama Sakian dulu Salam andiko Dari Tapian Teluk Palu Pada Selasa, 09 April 2013 11:28:55 UTC+7, Dessy Yulia menulis: > > Uda Andiko dan mamak2 kasadonyo > > > -- . * Posting yg berasal dari Palanta RantauNet, dipublikasikan di tempat lain wajib mencantumkan sumber: ~dari Palanta R@ntauNet~ * Isi email, menjadi tanggung jawab pengirim email. =========================================================== UNTUK DIPERHATIKAN, melanggar akan dimoderasi: - DILARANG: 1. E-mail besar dari 200KB; 2. E-mail attachment, tawarkan & kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://rantaunet.wordpress.com/2011/01/01/tata-tertib-adat-salingka-palanta-rntaunet/ - Tulis Nama, Umur & Lokasi disetiap posting - Hapus footer & seluruh bagian tdk perlu dlm melakukan reply - Untuk topik/subjek baru buat email baru, tdk mereply email lama & mengganti subjeknya. =========================================================== Berhenti, bergabung kembali, mengubah konfigurasi/setting keanggotaan di: http://groups.google.com/group/RantauNet/ --- Anda menerima pesan ini karena Anda berlangganan grup "RantauNet" dari Grup Google. Untuk berhenti berlangganan dan berhenti menerima email dari grup ini, kirim email ke rantaunet+berhenti berlangga...@googlegroups.com . Untuk opsi lainnya, kunjungi https://groups.google.com/groups/opt_out.