Bundo Nismah sarato adidunsanak Palanta Budiman,
Tarimo kasih untuak perhatian Bundo ka case Etek Rina tu, akan Rina sampaikan InsyaAllah ka keluarga simpati Rang Palanta basamo. Rina sangaik banyak dapek carito mengenai Parang Pereri ko juo Parang Bulando saketek tentang parang Japang dari nenek jo Inyiak. Tapi ado saketek yang menarik dari carito Mama. Ibu dari Mama (nenek) takato sebagai urang bagak di kampuang kami. Nenek indak takuik rumahnyo dijadian basis perbekalan logistic di kampuang kami beda jo Inyiak. Pernah mama carito kalo suatu ketika seandainya nenek indak sigap menyuruakkan sanjato (badia bageren ; lupo2 ingek rina namonyo ) ka ateh loteng rumah. Sabalun tu ado OPR jo tantara pusek nan mamareso ka dalam rumah. Kutiko tu malamnyo sudah manyiapkan pasukan dunsanak2 awak nan bajuang utk masuak rimbo. Pas ukatu tu dikusai rumah dek tantara tu, dek mereka curiga rumah tu dijadian tampek logistic. Sampai pas ka dibukak loteng dek salah surang tantara, pas lo ado panggilan dari komandannyo di halaman rumah, lansuang bubar mereka tu. Sadonyo nan di dalam rumah nenek jo anak2 liau nan masih ketek-ketek tu manahan angok. Sebab jikok sampai dapek dek mereka senjata tu, habislah mereka sakaluarga. Mode itulah baraninyo Nenek kato Mama. Hanyo sajo di kampuang kami ukatu tu ado juo nan jadi pengkhianat tu. Sasudah bunyi tontong ciek-ciek nan tandonyo alah aman, ado rang gaek marauang-rauang anaknyo kanai tembak, ado nan kanai mortir, adolo kawan nenek nan bakadai di tapi tabek kami. Ukatu di rimbo kanai pacahan mortir, ado nan maningga, adolo surang namo liau Nyiak Idi, kapalo liau kanai pacahan mortir ko. Nenek jo Mama ikuik manjapuik liau ko ka rimbo, caro mambaok liau pulang hanyo pakai buo buah bilah nan disangkuikkan kain saruang sabalah manyubalah, sudah tu didegeng sapanjang jalan, namo rimbonyo tu Rimbo Manduang. Rina pernah caritokan sampai 2 seri tentang Masuak Rimbo 1 dan Masuak Rimbo 2 di posting nan lah daulu. Sapanjang jalan pulang lah manitiak-nitiak darah dari bawah kain saruang liau ko. Sarato ado banak liau nan nampak-nampak. Namun tolong Allah SWT, Inyiak ko sehat baliak sampai beberapo tahun nan lalu, masih basobok jo ambo masih bakadai di tapi tabek kami sehat hanyo sajo bakeh kapalo liau nan kanai mortar tu masih nampak. Dek liau salalu botak. Ado istilah nan salalu disabuik dek Nenek atau Mama jo Inyiak mamuloi carito mereka yang salalu tangiang-ngiang. Kato2 'Nagari Parang" jo kato2 "Nagari lah Aman". Dari kato ko Rina bisa manyimak baso antaro kaduonyo ko, sabana jauah jurang pamisahnyo. Sungguah sangaik maha untuak mendapekkan " Nagari Aman" ko. Sahinggo indak salah apo nan dikatoan Pak Epi Buchary di posting liau. Tentang raso indak sanang ka urang Jawa masih tasiso di hati sebagian besar urang-urang tuo awak tarutamo nan talibaik jo PRRI saisuak tu. Rinapun awalnyo ndak habis pikia, mangalah Papa indak setuju katiko Mas Permadi melamar Rina? Apo yang salah? Manga Papa masih bakareh urang awak juo nan katuju untuak jodoh anaknyo? Padohal jodoh di tangan Allah SWT kan? Tanyato ikolah nan jadi sebabnyo, dendam Liau ka Urang Jawa indak bakurang-kurang sajak liau ikuik bajuang jo Pak Imam di maso-maso akhir PRRI tahun 1960-61. Liau marasoan sagalo kekejaman parang tamasuak Hilangnyo Etek kami tu sebagai puncaknyo. Sampai Abang Rina baiyo-iyo jo Papa, apo sebabnyo liau ndak katuju jo Mr Permadi? Tapi liau baliak batanyo? Manga musti Urang JAwa? Urang Jawa ko kan musuah den sajak taisuak? Tapi Alhamdulillah setelah pembicaraan tu, diagiah izin akhirnyo. Jadi untuak kondisi ko, sangaik dimaklumi sajo kalo masih ado raso dandam di hati urang-urang tuo kito ko. Parang kan memang kejam. Alhamdulillah kami lahia sasudah jaman itu tajadi. Sekedar sharing.. Wassalam Rina, 33, batam (Maaf agak dibesarin, spy Bundo sanang mambaconyo) -- . Posting yg berasal dari Palanta RantauNet ini, jika dipublikasikan ditempat lain wajib mencantumkan sumbernya: ~dari Palanta r...@ntaunet http://groups.google.com/group/RantauNet/~ =========================================================== UNTUK DIPERHATIKAN, melanggar akan dimoderasi: - DILARANG: 1. Email besar dari 200KB; 2. Email attachment, tawarkan disini & kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://groups.google.com/group/RantauNet/web/peraturan-rantaunet - Tulis Nama, Umur & Lokasi pada setiap posting - Hapus footer & seluruh bagian tdk perlu dalam melakukan reply - Untuk topik/subjek baru buat email baru, tidak dengan mereply email lama =========================================================== Berhenti, bergabung kembali serta ingin merubah konfigurasi/settingan keanggotaan di: http://groups.google.com/group/RantauNet/subscribe
