Envío o comentario sobre algunhas ============================================================================0 - check propostas: (vbo)verificar, comprobar, confirmar, revisar, corrixir
Actualmente a tradución máis habitual é verificar, pero o sentido galego de verificar é a indicación de se algo "é/non é verdade". Probablemente se trate dunha extensión abusiva a partir de "caixa de verificación, caixa de comprobación", que consiste nunha marca de activar/desactivar unha opción. A partir de aí estendeuse a todo o que supoña a elección e ás accións relativas á confirmar o estado dunha opción. É un anglicismo con potencial expansivo como se pode comprobar en español americano co uso de "checar". Neste sentido máis xeral, a palabra non marcada sería "comprobar" Outro uso diferente é o relativo aos motores de gramaticais e ortográficos. Nese contexto, verificar é claramente un anglicismo innecesario xa que en galego común indícase como "corrixir". Non hai diferenza entre o spell/grammar check, que serán denominados corrección ortográfica/gramatical. Para evitar os usos abusivos e o anglicismo acórdase: - > comprobar (cando se trate de facer unha acción): comprobar se o ficheiro está en uso - > revisar (cando se trate dunha configuración, opción): revisar se as maiúsculas están activadas - > corrixir (cando se trate de executar unha función): corrixir a ortografía dun texto - > verificar > conforme os usos xerais DRAG v.t. 1. Face-las probas precisas para ver se [unha cousa] é verdadeira, ou se é cómo debe de ser. A policía verificou a declaración da testemuña. CF. confirmar.Hai que verifica-la calidade do ouro. SIN. contrastar.Verificar un peso. SIN. comprobar. 2. Examinar [algo] para comprobar que está en perfecto estado e que funciona. Verifica-los freos do coche. Verificar un motor. 3. Demostrar por medio de argumentos e probas que [unha cousa] é verdade. Esta proba verifica que o acusado estaba no lugar do crime. SIN. confirmar. // v.p. 4. Ser [unha cousa] ou ocorrer tal como se predixera. As prediccións do tempo verificáronse. SIN. cumprirse. relacionadas: - (checkbox) caixa de verificación > caixa de selección (está tradución non foi confirmada na Trasnada, podería optarse tamén por caixa de control ou caixa de opción) - suma de verificación > suma de comprobación (está tradución si foi confirmada na Trasnada) - (make sure) verifique > asegúrese de - (checking) > comprobación, pero con casos especiais como checking sequence > control de secuencia, ou paritiy check > control de paridade, xa que aquí o valor conceptual é diferente en inglés. ================================================================= - environment Computing an operating system, program, or integrated suite of programs that provides all the facilities necessary for a particular application: a word-processing environment propostas: (nome) contorno, entorno, contorna, ambiente Nota prescindible: É o caso máis complexo que nos podemos atopar pero para a tradución informática necesitamos precisión e coherencia e que as propostas neolóxicas sexan directas e non choquen cos usos xerais. Desde un punto de vista estritamente filolóxico, "ambiente" ou "medio" terían sido as solucións ideais, adaptando a metáfora ao eido informático, pero encontrámonos con que esa palabra xa en inglés presenta múltiples acepcións, e algunhas delas teñen equivalentes con outras palabras xa existentes en galego, que tamén teñen a súa historia e múltiples acepcións. E ademais xa se produciu unha complexa especialización. Temos un problema terminolóxico, non filolóxico. + environment, medio ... >>> + environmental, ambiental ... >>> + environmentalism, ecoloxismo ... >>> + environmentalist, ecoloxista ... >>> Por outro lado o valor xeral que intenta transmitir non é exclusivo da ciencia informática e xa se asentou hai tempo na lingua no campo das ciencias naturais e sociais. O que antes era campo agora é medio natural ou ecosistema, ou o que era o tempo agora tamén é o ambiente. Produciuse pois unha readaptación dunha longa serie de palabras, a través de múltipes matices que hoxe están moi cargadas de connotacións que non podemos esquecer: ámbito e ambiente, veciñanza e medio, etc. Resultaría moi chocante, confuso, para os falantes falarmos do ambiente dun aplicativo (hai que estar de bo humor para manexalo?) e se falamos de configurar o ambiente do escritorio pensariamos antes en decoración de interiores que en instalar a plataforma java. Por esa razón, os tradutores informáticos, buscaron desde sempre en galego unha alternativa e optaron basicamente por dúas solucións: entorno e contorno. Se "o que nos rodea" é o contorno, porque *entorno é castelanismo, entón contorno deberia funcionarnos ben. A cuestión que debatemos é que contorno presenta problemas porque ten acepcións confusas. Se contrastamos as definicións da RAG (máis abaixo), vemos que non nos queda ningunha saída produtiva e a ningún se nos escapa que usar "contorno" no sentido que buscamos resulta forzado porque choca co valor que a propia RAG nos dá nos dicionarios oficiais. En resumo, ambiente xa se nos escapou e contorno significa segundo a RAG outra cousa. Estamos orfos. Exemplo: se nos atopamos unha mensaxe que nos di contorno incorrecto, modificouse o contorno (a que se refire ? borde? contorno? medio?... pois é «wrong environment») Contorna é unha palabra que ten un uso totalmente diferente (=comarca). Contorno colisiona aparentemente con bordo; ambiente en galego é principalmente adxectivo, non substantivo. Como substantivo, ambiente, resulta abusivo estender o seu valor en galego á interface de usuario por estar moi apegado ao medio físico. Esta é a razón pola que entorno e ambiente seguiron camiños diferentes. É evidente que o galego utiliza hoxe entorno por influencia do castelán en multitude de ámbitos, con referencia ao medio físico, como palabra máis xeral, mentres que ambiente como medio anímico, sentimental. Entorno presenta a particularidade de non estar recollido nin no VOLG nin no DRAG. Esta é a explicación de por que se lle engadiu o valor de environnement a contorno. Chama moito a atención que se contorno é perímetro, poida ser "sinónimo" de contorna, arredores ou ambiente. Ese é o valor de "entorno" que a RAG omite, seguramente por consideralo castelanismo. Isto tamén crea problemas de precisión importantes nas interfaces xa que o contorno considérase continuo (idealmente unha liña) arredor dun obxecto xeométrico, un único elemento, mentres que un bordo é un elemento de cada un dos cantos dunha figura. Así un cadrado ten un cortorno e catro bordos. O que xa non se pode asumir é que ademais o escritorio ou a plataforma na que se executa un aplicativo sexa tamén un contorno. Ademais en inglés adóitase distinguir totalmente entre outline, environment e border. De feito vemos que tanto no Corpus Técnico do Galego (CTAG) onde se documenta o seu uso no sentido de "medio que rodea", no Tesouro Informatizado da Lingua Galega (TILG) coma no corpus CLUVI de inglés-galego informático (todo KDE) está máis ca documentado. En portugués entorno é unha palabra normal co significado de "arredor, en torno de". En galego temos entornar (en+tornar). En catalán e castelán, entorno é a palabra de aplicación neste concepto. Mentres que en portgués e italiano sono "ambiente". Trátase pois, se fose un castelanismo, da necesidade dun préstamo técnico xa asentado. Se o consideramos un neoloxismo, creado a partir de "en torno de" (e non de *en torno a), para dar conta do que sería "o medio, a interface, o envoltorio, que rodea, na que o usuario ou o aplicativo funcionan". En resumo, trátase de propoñer á RAG que admita esta palabra, de creación recente para nós, que teñen as linguas románicas da nosa contorna. O tradutores vímola empregando empregando neste campo desde hai décadas. relacionadas: - contour > contorno - outline > contorno - border > bordo - edge > bordo DRAG contorno s.m. 1. Límite exterior dun corpo ou dun obxecto, e liña que describe ese límite. O contorno dunha mesa. SIN. perímetro. CF. periferia. Os contornos da cara. SIN. perfil, silueta. 2. Zona ou territorio máis ou menos delimitado arredor dun lugar considerado como o núcleo. Non hai mentireiro coma el en todo o contorno. SIN. contorna, redonda, volta. bordo s.m. Parte que limita unha superficie ou en que remata un obxecto. Estaba sentado no bordo da estrada. SIN. beira, marxe. CF. canto4. contorna s.f. Zona ou territorio máis ou menos delimitado arredor dun lugar considerado como o núcleo. Non había casa máis rica en toda a contorna. SIN. contorno, redonda, volta. ambiente adx. 1. Que rodea un corpo ou constitúe o medio onde se está. A temperatura ambiente. // s.m. 2. Aire que nos rodea. O ambiente das cidades está cada día máis contaminado. SIN. atmosfera. 3. Conxunto de condicións en que se desenvolve calquera tipo de vida. Ambiente acuático. A protección do ambiente. SIN. medio. 4. fig. Conxunto de condicións ou circunstancias de tipo económico, social, cultural, etc., no ámbito das cales vive unha persoa. Criouse nun ambiente de pobreza. SIN. atmosfera, medio. 5. fam. Característica do lugar en que hai animación, alegría, bo humor, etc. Os sábados hai moito ambiente polas rúas.
_______________________________________________ Proxecto mailing list Proxecto@trasno.net http://listas.trasno.net/listinfo/proxecto
