Ceuk beja, nu neangan kapal AdamAir anu leungit, manggihan sinyal logam di laut deukeut Mamuju dikajeroan 1500 meter. Cenah alat nu manggihan logam teh sonar. Lamun teu salah mah sonar mah, make sinyal sora (sound wave). Sonar memang bisa ngararampa kira-kira bentuk tina obyek nu diteangan, ngan ari bahanna mah, ceuk kuring mah, moal bisa ku sonar. Alat paragi ngadeteksi logam nu paling ampuh disebut magnetometer. Ieu alat ngamanfaatkeun medan magnet bumi nu aya dialam. Lamun aya obyek dijero laut dijieun ku logam, medan magnet bumi di "permukaan" laut jadi robah, beda ti sabudeureunana (disebut anomali) sabab medan magnet bumi ngainduksi obyek eta, tepi ngarobah harga medan magnet di"permukaan" laut.
Jadi KRI Fatahilah teh meureun make magnetometer, mana bisa nyebutkeun ngadeteksi logam oge, lain sonar. Kuring kungsi survey neangan obyek di jero laut di "leupas basisir" (lepas pantai) Situbondo, make sonar oge make magnetometer. Sonar keur bentukna (lain kuring nu nyekelna), jeung magnetometer keur ningali naha logam atawa nu sanes, kabeneran kuring nu nyekel magnetometer ....eh maksud teh nu nafsirkeun datana, da ka lautna mah ngan kuat tilu jam dina kapal, langsung ...utah-uger, mabok ... Cik ka baraya nu langkung ngartos soal nu kieu, naha leres sonar tiasa ngadeteksi logam? NB. Sakalian naroskeun, naon kira-kirana basa sundana : 1. Permukaan laut 2. Lepas pantai 3. Obyek (atawa tetep wae kitu) 4. Perairan, contona Perairan Mamuju 5. Gelombang (wave) Baktos, WALUYA
