Assalamu'alaikum.w.w.
.... kito sambuang baliak nan kapatang....
(dik Rahima tolong correct me again and again,
rancak kito mangaji pado eboh dek Sutan BN,
baatu Ad ?, Ce-cile ?, sukma ?,
jo dunsanak kasadonyo)
....
Patang lah nan ka bara ?, sabanta ..ambo caliak
baliak.
Oh, patang nan partamo baru.
Jadi, urang-urang nan diagiah-Nyo pakaian, jo
dilatakkan di bawah ‘arasy dek Allah swt. ko :
Nan kaduo, urang mudo nan dari awal-awal, dari
mudo-mudonyo beramal.
Nan katigo, urang nan rajin berjamaah di masjid.
Nan kaampek duo urang nan berkasih-kasihan karena
Allah
swt. (mukasuiknyo indak percintaan dua remaja do,
Cubo buek di RN ko takah iko, cinta karena Allah benci
karena Allah, asyidaa-u 'alal kuffar, ruhamaa-u
bainahum).
Nan ka limo, urang nan basidakah karena Allah indak
nyo
sabuik-sabuik.
Nan ka anam, Pemuda nan nyo rayu dek surang padusi
untuak babuek sumbang salah, nyo katokan,
“Ambo takuik jo Tuhan Allah”
Nan katujuah, urang nan bazikir maingek Allah wakatu
malam sorang-sorang, manitiak aia matonyo.
Mari awak piliah salah satu, ciek pun jadilah,
mudah-mudahan awak indak kanai matoari nan angek bana,
raso sajangka, raso sa eto dari kapalo, kalua paluah
sampai banjir di sinan.
Tuan-tuan bayangkan, kini matoari 98 juta mil labiah
latak jauahnyo dari bumi. Itu pun angek, cubo
bayangkan kok sajangka di ateh kapalo. Kalau nyo geser
dek Allah swt. agak saketek mandakek ka bumi ko, mako
caia lah bumi ko. Manggalagak sungai, manggalagak
lauik, aia liua pun manggalagak, kok nio maabuih talua
dikulum-kulum sajo bisa ...:).
Kalau diangkek saketek, dingin bumi ko. Mako di padang
mahsyar, batilanjang, bantuak baru lahia. Tapi ado
nan
diagiah pakaian dek Allah swt. Dan banyak nan indak
bapakaian. Masiang-masiang indak peduli jo urang lain,
nan dipikiakannyo dirinyo surang. Ndak sempat
mancaliak urang
“Eh batilanjang lo si anu tu ma”, ... :)
indak... ndak sempat, dirinyo sorang ndak tapikiakan
dek nyo doh.
Baliak awak baliak, siksaan Allah barikuiknyo ka
urang nan mautamokan dunia ko
“Wa qukhiza min halawatul ‘ibadah”, dicabuik dari inyo
manisnyo ibadah. Baa rasonyo awak sumbayang, lai lamak
ndak awak sumbayang agak agak?.
Baa misalnyo kok lamo lo imam tu sumbayang, memang
dianjurkankan kalau jadi imam indak buliah
lambek-lambek dan indak pulo capek, sederhana.
Tapi baa kiro-kiro kok lamo juo imam tu ?.
Apo lai kok lah tuo imam tu, sumbayang subuah,
sumbayang tarawiah. Awak nan di balakang babisiak di
hati, “Kantuik imam ko mah”... :)
Padahal awak menghadap Allah swt.
Sabananyo kok lamo kan banyak nan bisa dibincangkan
jo Allah swt. Banyak nan bisa dipakiakkan parasaian
(dalam hati) ka Allah swt. Tu makonyo awak di sunatkan
bado’a lamo dalam sujuik tu. Sabab, awak paliang dakek
jo Allah swt. katiko sujuik.
“Akrabu wa yakunul ‘abduhu li rabbihi wahuwa saajid”.
wakatu sujuik tu lah paliang dakek kito ka Allah swt.
Buliah sujuik nan ma sajo, ndak harus yang terakhir,
Cuma kalau tiok sujuik lamo, takuik lupo lo rakaat
sumbayang. Itu sajo masalahnyo, tu mako sujuik
terakhir, tapi dengan syarat bukan jadi imam. Sabab
jadi imam ndak buliah lamo-lamo. Lamo-lamo bana makmum
manunggu, lamo-lamo bana, makmum nan in ndak paham
“eh baa lo imam ko ko”, nyo duduak “eh baa lai ko…”.
Keceknyo pulo... :)
Kalau ka mamintak, sumbayang sorang-sorang, buliah
lamo-lamo, malam-malam cubo sorang, taraso ndak
lamaknyo baibadat tu ?.
Awak kadang-kadang, bilo sumbayang fardhu lai
lamo-lamo, tapi tiko sumbayang sunat capek bana. Antah
dek aa, kito ubah parangai tu, sumbayang sunat tu kan
sumbayang juo, biaso lah sarupo sumbayang fardhu. Ndak
usah takaja-takaja ka pulang. Atau ka basalam-salam.
Sumbayang dulu baru basalam. Kadang-kadang payah
maubah
tabi’at. Samo lo katiko jum’at. Sabalun jum’at rami
urang sumbayang sunat, tapi sasudah sumbayang banyak
nan pulang, padahal sabalun tu indak mu’akad, sasudah
jum’at mu’akad. Tabaliak, nan mu’akad nyo tinggakan
nan indak mu’akad nyo buek. Hampia 99 persen urang
sumbayang sunat sabalun jum’at, tapi indak sasudah
jum’at. Salah piliah. Kan rugi.
Tapi lain pulo kok sakironyo urang sumbayang dapek
pitih, pasti rami urang nan sumbayang ...:).
Pasti barabuik-rabuik.
Misalnyo “Sia nan sumbayang sunat sudah jum’at diagiah
50.000”, eh nyo tunggu dek urang tu mah....:)
Dek aa sumbayang, he he he he dapek pitih...)
Balain, balain bana awak jo urang dulu.
Urang dulu barabuik-rabuik mancari pahalo.
Urang zaman Nabi dulu barabuik-rabuik pahalo.
Suatu hari caritonyo, babarapo urang sahabat,
urang-urang nan miskin-miskin datang basuo jo nabi,
“Yaa Rasulullah, urang-urang kayo ko banyak
pahalonyo”
“Eh baa tu” kecek Nabi.
“Yushallu kama nushalli, inyo sumbayang kami
sumbayang”
“Yasuumu kama nasuum, inyo puaso kami puaso”
“Tapi bilo mereka basidakah, sudah, kami ndak
bisa
basidakah do, aratinyo urang kayo-kayo tu banyak
pahalo yaa Rasulullah”,
Co itu bana mereka sampilik jo pahalo ko, dan
barabuik-rabuik pahalo. Takuik bananyo urang kayo ko
banyak pahalo mereka indak.
Kecek nabi “Takah iko, kalian pulanglah, sampai di
rumah wirid Subhanallah subhaanallah tigo kali,
alhamdulillah tigo kali, Allahu akbar tigo tigo kali”.
Dek karano tiok tiok tasbih satu sedekah tiok tiok
tahmid satu sadakah.
Kecek nabi “Bilo kalian wirid akan samo pahalonyo jo
urang-urang tu”.
Ndeeh sanang bana hati urang-urang miskin, pulang
mereka, mereka wirid, kecek mereka pulo
“Jan diagiah tahu urang-urang kayo tu”.
Sanang lah hati mereka ko. Ndak bara lamo sudah tu
bocor rahasio ko, urang kayo wirid pulo,
datang pulo baliak ka nabi
“Yaa Rasulullah urang kayo-kayo wirid pulo yaa
rasulullah”. ...:)
Caliak dek tuan-tuan, aratinyo yobana barabuik-rabuik
dapek pahalo tu. Aa kecek nabi sudah tu,
“Baa pulo lai lah takadia dari Allah swt.”
Carito ko mancaliakkan urang-urang dulu
barabuik-rabuik pahalo.
.... Eh sabanta lo dulu, bisuak kito sambuang.....
Wassalam
St. Sinaro
__________________________________
Do you Yahoo!?
Yahoo! Search - Find what you’re looking for faster
http://search.yahoo.com
____________________________________________________
Berhenti/mengganti konfigurasi keanggotaan anda, silahkan ke:
http://groups.or.id/mailman/options/rantau-net
____________________________________________________
